Felix vu Bourbon-Parma

Vu Wikipedia
Op d'Navigatioun wiesselen Op d'Siche wiesselen
Felix vu Bourbon-Parma
Félix de Bourbon-Parme 1919.JPG
Gebuer 28. Oktober 1893
Gestuerwen 8. Abrëll 1970
Gemeng Fëschbech
Nationalitéit Lëtzebuerg
Famill
Bestuet mat Charlotte vu Lëtzebuerg
Kanner Jean vu Lëtzebuerg, Élisabeth vu Lëtzebuerg, Marie-Adélaïde vu Lëtzebuerg, Marie-Gabrielle vu Lëtzebuerg, Charles vu Lëtzebuerg, Alix vu Lëtzebuerg
Wikidata-logo-without-paddings.svg

De Félix Marie Vincent Prënz vu Bourbon-Parma, gebuer den 28. September 1893[1] zu Schwarzau am Steinfeld bei Wien (Éisträich), a gestuerwen den 8. Abrëll 1970 zu Fëschbech, war dat uechtzéngt Kand vum Robert I. vu Parma an dat sechst Kand mat deem senger zweeter Fra, der Maria Antonia vu Bragança, der Schwëster vun der Maria Ana vu Bragança, also vu senger spéiderer Schwéiermamm.

Hie war de jéngere Brudder vun der Keeserin Zita vun Éisträich. Säi Grousspapp war den 1834 ofgesate Kinnek Miguel I. vu Portugal.

De Félix vu Bourbon-Parma gëtt Prënz vu Lëtzebuerg[änneren | Quelltext änneren]

De 6. November 1919 huet hie seng Kusinn, d'Groussherzogin Charlotte vu Lëtzebuerg bestuet. Den Dag virdrun hat d'Chamber, mat knappsser Majoritéit, seng Naturaliséierung gestëmmt. Doduerch gouf hie Prënz vu Lëtzebuerg. Déi Entscheedung war net onëmstridden, well de Félix am Éischte Weltkrich Leitnant a Capitaine an der éisträichescher Arméi war.

D'groussherzoglech Koppel krut sechs Kanner. 1921 gouf de spéidere Groussherzog Jean vu Lëtzebuerg gebuer, 1922 d'Elisabeth, 1924 d'Marie-Adelaïde, 1925 d'Marie-Gabrielle, 1927 de Charles a 1929 d'Alix.

De Prënz Félix war vum 23. Januar 1937 bis de 25. Abrëll 1951 Member vum Staatsrot.[2]

De Prënz Félix am zweete Weltkrich[änneren | Quelltext änneren]

Den 10. Mee 1940 ass de Prënz Félix mat senger Famill an der Lëtzebuerger Regierung an den Exil gaangen, fir d'éischt op Paräis, duerno op Lissabon. De 15. Juli verléisst de Félix mat de Prënzekanner déi portugisesch Haaptstaadt, ouni seng Fra, a fiert an Amerika, wou e vum President Roosevelt empfaange gëtt. Bis 1942 hält sech d'groussherzoglech Famill haaptsächlech an de Vereenegt Staate vun Amerika an am Kanada op.

Am Oktober 1942 verléisst de Prënz Félix zesumme mat sengem eelste Jong, dem Prënz Jean, de Kanada fir sech a Groussbritannien an der Arméi z'engagéieren. De Prënz Jean meld sech bei den Irish Guards, de Prënz Félix gëtt "officier de liaison" beim "Northern Command". Do huet e gehollef d'"Luxembourg Battery", eng Eenheet vu lëtzebuergesche Volontären opzebauen, déi Deel vun der belscher Brigade Piron war.[3]

Am Juni 1944 gouf de Félix bei déi 12. US-Arméi, bei de Generol Bradley, geschéckt. Hien huet sech duerno verschiddenen Eenheeten ugeschloss, fir bei der Befreiung vu Lëtzebuerg kënnen dobäi ze sinn. Den 10. September 1944 ass hien zesumme mam Prënz Jean mat der 5. US-Panzerdivisioun zu Lëtzebuerg amarschéiert a vun der Bevëlkerung gefeiert ginn.

Grad wéi de Prënz Jean huet och de Félix bis zum Krichsënn weidergekämpft, a war zum Beispill bei der Befreiung vum Konzentratiounslager Dachau dobäi.[4]

De Prënz Félix no dem zweete Weltkrich[änneren | Quelltext änneren]

Hie war och Colonel vun der Fräiwëllegekompanie an Inspecteur-Général vun der Lëtzebuerger Arméi vun 1945 bis 1967.

Tëscht 1923 an 1932 an dann nees tëscht 1947 an 1969 war hie President vum Lëtzebuerger Roude Kräiz.

Um Spaweck[änneren | Quelltext änneren]

Commons: Felix vu Bourbon-Parma – Biller, Videoen oder Audiodateien

Referenzen an Notten[Quelltext änneren]

  1. Dafregëster vun der Por Schwarzau am Steinfeld
  2. Lëscht vun de Membere vum Staatsrot um Site vum Staatsrot
  3. Informatiounen aus: Chronologie "Léif Lëtzebuerger" Chronologie 1939-1942 - PDF an Chronologie 1942-1945 - PDF
  4. Informatiounen aus: E.T. Melchers, Luxemburg 1944-45 - Befreiung und Ardennenoffensive, S. 119- 121, Imprimerie Saint-Paul, Luxembourg, 1981

<- hie war gewass nëmme "Ritter"! Grousskräiz wäert e gewiescht sinn.