Ouschterméindeg

Vu Wikipedia
Wiesselen op: Navigatioun, sichen
Den Ouschterméindeg als gesetzleche Feierdag an der Welt

Den Ouschterméindeg gehéiert mam Stiefesdag an dem Péngschtméindeg zu der Kategorie vun den zweete Feierdeeg am Chrëschtentum. A ville Länner ass et e gesetzleche Feierdag, dorënner an der ganzer EU ausser a Portugal an a verschiddene spuenesche Regiounen.

Et ass den Dag no Ouschteren an domat huet e kee fixen Datum. An den éischte chrëschtleche Joerhonnerte gouf Ouschteren eng ganz Woch laang nom Ouschtersonndeg gefeiert, mee op deene meeschte Plaze gouf et duerno op een Dag reduzéiert.

Liturgesch Bedeitung[änneren | Quelltext änneren]

Déi zwee Jünger erkennen de Jesus beim Brieche vum Brout zu Emmaus

Den Ouschterméindeg huet liturgesch de Rang vun engem Héichfest.

An der Mass gëtt deen Dag aus dem Evangelium d'Geschicht vun der Operstéiung vum Jesus aus der Siicht vun den Emmaus-Jünger erzielt. Déi zwéin hu sech den drëtten Dag no der Kräizegung vum Jesus zu Jerusalem op den Heemwee gemaach. En Onbekannte schléisst sech hinnen un, deen hir Trauer hannerfreet an hinnen dunn erkläert, datt de Messias all dat huet missen erleide wéi déi al Schrëften et virausgesot haten. Zu Emmaus invitéieren d'Jünger de Mann an eng Herberg, wou deen dunn d'Brout brécht a si dorun de Jesus erkennen, deen awer virun hiren Ae verschwënnt. Si maache sech direkt nees zréck op Jerusalem, wou se nach an derselwechter Nuecht ukommen an den do versammelte Jünger vun hirem Erliefnes erzielen.