Lëtzebuerger Nationalfeierdag

Vu Wikipedia
Wiesselen op: Navigatioun, sichen
D'Tribün virum Arbedsgebai vu wou déi offiziell Gäscht der Parad nokucken (2016)
D'Arméi op der Militärparad (2016)

De Lëtzebuerger Nationalfeierdag ass zu Lëtzebuerg en offizielle Feierdag a gëtt all Joer den 23. Juni gefeiert.[1] Zanter der Onofhängegkeet vu Lëtzebuerg gëtt op dësem Dag de Gebuertsdag vum jeeweilege Monarch gefeiert an den Dag gouf (a gëtt) dowéinst och als Kinneksdag, Kinneksgebuertsdag oder Groussherzogs- respektiv Groussherzoginsgebuertsdag bezeechent.

Geschichtlech Entwécklung[änneren | Quelltext änneren]

Den Nationalfeierdag gouf net ëmmer op dem 23. Juni gefeiert. Ënner dem Wëllem I (1815-1840) gouf en de 24. Abrëll gefeiert, obscho säi Gebuertsdag de 24. August war.

Ënner dem Wëllem II (1840-1849) gouf den Dag effektiv op sengem Gebuertsdag, dem 6. Dezember gefeiert wat dozou gefouert huet, datt 1840 den Nationalfeierdag zweemol gefeiert gouf.

Ënner dem Wëllem III (1849-1890) gouf den Dag bis 1859 um 17. Juni gefeiert, duerno war et den 19. Februar, zwee Dag no sengem Gebuertsdag.

No der Trennung vum hollänneschen a lëtzebuergeschen Herrscherhaus 1890 gouf ënner den Nassau-Weilburger Monarchen den Nationalfeierdag op dem jeeweilege Gebuertsdag gefeiert. 1947 gouf den Dag als offizielle Feierdag deklaréiert.[2]

Ënner der Herrschaft vun der Groussherzogin Charlotte (1919-1964) ass d'Feier op den 23. Januar gefall, also matzen an de Wanter an och hiren Trounfolger Jean hat säi Gebuertsdag am Januar. Dofir gouf den 23 Dezember 1961 duerch e groussherzogleche Beschloss, aus reng klimatesche Grënn, decidéiert, de Nationalfeierdag op den 23. Juni ze verleeën (bis 2006 war et esou, datt wann deen Dag op e Sonndeg gefall ass, de Feierdag op de 24. Juni verluecht gouf)[3][4]. Dësen Dag gouf och ënner hiren Nofolger um Troun bis elo bäibehalen.

Oflaf vun de Feierlechkeeten[änneren | Quelltext änneren]

Virowend vum Nationalfeierdag[änneren | Quelltext änneren]

  • Beim Groussherzogleche Palais an der Stad ass géint 16 Auer eng feierlech Ofléisung vun der Garde.
  • Déi groussherzoglech Koppel mécht eng offiziell Visite a enger gréisserer Uertschaft vum Land. Et gëtt all Joer eng aner Uertschaft besicht.
  • Déi ierfgroussherzoglech Koppel, respektiv den Ierfgroussherzog, mécht eng offiziell Visite zu Esch-Uelzecht, der zweetgréisster Stad vum Land.
  • Owes, nodeems d'groussherzoglech Famill nees zréck an der Stad ass an um Knuedler oder bei der Gëlle Fra empfaang gouf, ass an der Stad e Fakelzuch, un deem sech vill Veräiner aus dem ganze Land bedeelegen.
  • Tëscht 23 Auer a Hallefnuecht ass e grousst Freedefeier, dat normalerweis vun der Neier Bréck ofgeschoss gëtt an zanter enger Rei Joren och musikalesch begleet gëtt. Während de Renovatiounsaarbechte vun der Neier Bréck gouf d'Freedefeier op den Dräi Eechelen ofgeschoss.
  • Op ville Plaze vun der Stad ginn deen Owend Concerten organiséiert.

Offiziell Feierlechkeeten um Dag selwer[änneren | Quelltext änneren]

D'Kanounen um Fetschenhaff am Asaz op Nationalfeierdag (2004)
  • Zanter 2014 gëtt an der Philharmonie (2014 war et den Theater) en zivile Festakt ofgehalen. Bis 2013 war zu dësem Zäitpunkt vum Dag den Te Deum an der Stater Kathedral.
  • Duerno gi vum Fetschenhaff aus vun der Arméi 21 Kanouneschëss ofgefeiert.
  • Géint Mëtteg ass an der Neier Avenue eng militäresch an zivil Truppeparad. Fréier war dat eng réng Militärparad, bei där de Groussherzog als ieweschte Chef vun der Arméi d'Truppen inspizéiert.
  • Am Nomëtteg ass den Te Deum an der Stater Kathedral.
  • An de Gemenge vum Land ginn op Nationalfeierdag vun de Gemengeverantwortleche lokal Feieren organiséiert.

Um Spaweck[änneren | Quelltext änneren]

Commons: Lëtzebuerger Nationalfeierdag – Biller, Videoen oder Audiodateien

Referenzen[Quelltext änneren]

  1. Nationalfeiertag (23. Juni) op gouvernement.lu
  2. Apropos ... die großherzogliche Familie Der Nationalfeiertag S.14 (PDF) .
  3. Mémorial A, 1961, No. 59, S.1075 (PDF) Service central de législation
  4. „Loi du 31 juillet 2006 portant introduction d'un Code du Travail.“ op Legilux - den Droitsportal vun der Lëtzebuerger Regierung; fir d'lescht gekuckt de 26. Juni 2016.