Stater Tram

Vu Wikipedia
Wiesselen op: Navigatioun, sichen
Banneraum vum Tramsmodell
Modell vum CAF-Tram wéi e soll zu Lëtzebueg fueren
Vue vun der geplangter Tramslinn an der Neier Avenue
Tracé vun der geplangter Tramslinn

De Stater Tram ass en Tram, dee vum 10. Dezember 2017 un an der Stad Lëtzebuerg fuere wäert.

Bedreiwer ass d'Firma LuxTram S.A..

Et ass dëst den Ufank vun engem zweete Stater Tramsréseau, nodeems et schonns tëscht 1875 an 1964 ee gouf, deem um Gebitt vun der Stad Lëtzebuerg a verschiddenen Nopeschgemenge gefuer ass.

  Méi Informatioun doriwwer am Artikel: Fréiere Stater Tram Nuvola apps xmag.png

Geschicht[änneren | Quelltext änneren]

Zanter 1990 gëtt et an der Stad Lëtzebuerg Bestriewungen, nees en Tram anzeféieren. Nodeems d'Pläng fir den éischte Projet BTB (Bus-Tram-Bunn) no de Gemengen- an Nationalwalen 1999 op Äis geluecht gi waren, huet et eng Zäitche gedauert, bis den Tram en neien Ulaf krut.

Den 10. Mäerz 2006 huet de Regierungsrot déi prinzipiell Zoustëmmung fir en neien Tram ginn an de 6. Abrëll 2006 gouf de Projet fir eng nei Tramslinn an der Stad Lëtzebuerg vun der Chamber gestëmmt.

2007 gouf de GIE LuxTram gegrënnt, dee Pläng ausschaffe sollt, fir en Tram duerch d'Stad fueren ze loossen. De 4. Juni 2014 huet d'Chamber mat 56 vu 60 Stëmmen de Gesetzprojet 6626 gestëmmt[1], mat deem 230 Milliounen Euro bewëllegt goufen, fir en Tram vun der Luxexpo op d'Stater Gare ze bauen. Dobäi kommen eng 124 Millioune vun der Stad Lëtzebuerg, sou datt d'Gesamtkäschten (inklusiv den Ënnerhalt fir 4 Joer) bei 354 Milliounen Euro leie géifen[2].

Den 21. Oktober 2014 hunn de Minister fir Nohalteg Entwécklung an Infrastrukturen François Bausch fir de Lëtzebuerger Staat, souwéi d'Buergermeeschtesch Lydie Polfer an déi Éischt Schäffin Sam Tanson fir d'Stad Lëtzebuerg den Akt ënnerschriwwen, fir aus der GIE LuxTram d'LuxTram SA ze maachen[3]. Dës Gesellschaft huet e Kapital vu 6 Milliounen Euro (zwee Drëttel de Staat, een Drëttel d'Stad) an als Aufgab, d'Material, dorënner d'Gefierer, unzeschafen, d'Streck an d'Schäpp bauen ze loossen an herno den Tram z'exploitéieren. Generaldirekter ass den André Von der Marck[4].

Als éischt gouf den Tramsschapp hannert der Luxexpo gebaut a mat den Aarbechten op der Avenue Kennedy (Kierchbierg) ugefaangen. Do war scho bei der Neiuluecht eng Verkéiersspur fir den Tram prett gehale ginn. D'Streck bis bei d'Rout Bréck soll bis den 10. Dezember 2017 fäerdeg sinn. Op där Plaz kënnt och d'Pafendaller Seelbunn un, déi vun der neier CFL-Halt Kierchbierg-Pafendall op der Nordstreck eropkënnt, an déi dann och soll fäerdeg sinn.

Den 12. Juli 2017 huet den Tram déi éischt Testfaart aus dem neien Tramsschapp iwwer de Rond-point Serra an d'Avenue Kennedy bis bei d'Coque gemaach.[5]

Ausbaupläng[änneren | Quelltext änneren]

Bis d'Fréijoer 2018 soll d'Linn bis op d'Stäreplaz ausgebaut ginn, fir da weider iwwer d'Avenue Émile Reuter, de Boulevard Royal an d'Nei Avenue) am Hierscht 2019 d'Stater Gare z'erreechen.

D'Rout Bréck an d'Nei Bréck goufen dofir schonn, wéi s'allen zwou 2014/15-17 renovéiert goufen, fir den Tram ugepasst.

Duerno soll dann, an enger zweeter Phas, d'Linn weider ausgebaut ginn, engersäits bis op de Fluchhafe Findel, anerersäits, via eng nei Gare um Houwald, bis op d'Cloche-d'Or zu Gaasperech. Dofir géifen nach eng Kéier 204 Milliounen Euro gebraucht ginn (Stand 2014), déi zu 100% vum Staat gedroe géifen. Am Juli 2017 soll den entspriechende Gesetzprojet an der Chamber agereecht ginn.[6] D'Betribskäschte solle sech vun do un all Joer ëm déi 18 Milliounen Euro belafen[4].

Déi komplett Linn bitt, wa se fäerdeg ass, op sougenannte Multimodal-Plattformen, Uschloss un 3 Garen (Houwald, d'Haaptgare, Kierchbierg-Pafendall), woubäi déi zwou leschtgenannt Neibaute sinn, Park & Ride-Parkhaiser an de Busreseau[7].

An de Plan sectoriels ass scho mol virgesinn, datt 4 weider Linne bäikomme kéinten: bis op Leideleng, Hollerech a Mamer, an eng Ofzweigung um Kierchbierg fir iwwer de Boulevard Konrad Adenauer op d'Luxexpo zo kommen.[6]

Rullmaterial[änneren | Quelltext änneren]

Den 18. Mee 2015 krut déi spuenesch Firma CAF (Construcciones y auxiliar de ferrocarriles), déi hire Sëtz zu Bilbao huet, vu LuxTram den Zouschlag fir d'Rullmaterial vum neien Tram ze liwweren. Den Design vun den Zich, dee speziell fir den Tram vu Lëtzebuerg gemaach gouf, ass vum Eric Rhinn. D'Zich wäerten eng Längt vu 45 m an eng Breet vun 2,65 m hunn a 450 Leit transportéiere kënnen. Technesch sinn d'Zich sou equipéiert, datt se deen Deel vun der Stréck, deen duerch de Stadzentrum féiert, ouni Uewerleitunge fuere kënnen. Dobäi gi se mat Stroum aus Akkumulatoren ugedriwwen[8]. Déi éischt Ramm (2 Kabinnen a 7 Modullen) gouf den 8. Februar 2017 an der Nuecht geliwwert[9].

Literatur[änneren | Quelltext änneren]

  • Hoffmann J.-P., Dhur R., Clesse R., Balthasar M., 1993: Tramways Municipaux - De Stater Tram 1875-1993, Éditeur: Ville de Luxembourg, Imprimerie Centrale, 260 S., ISBN 2-87993-000-6
  • AMFL Walferdange, 1986: Les tramways de la ville de Luxembourg - TVL, (Les chemins de fer luxembourgeois; Vol. 5), 156 S.
  • Thiry J., Usine et tramways électriques de la ville de Luxembourg. 1908-1933, Groupement des Amis du Rail (reprint), Luxembourg.
  • Federmeyer E., Schmalspurbahnen in Luxemburg. Band 1 & 2, GAR-Documentation, Luxembourg, 1991, ISBN 3-921980-46-1
  • De Leschten Tram, DVD, Ville de Luxembourg, CNA, 2005.

Kuckt och[änneren | Quelltext änneren]

Um Spaweck[änneren | Quelltext änneren]

Commons: Stater Tram – Biller, Videoen oder Audiodateien

Referenzen[Quelltext änneren]

  1. Historique an Text vum Gesetzprojet op chd.lu
  2. Guillaume Chassaing: "Luxtram S. A.: c'est signé." Le Quotidien, 22.10.2014, S.15; Christian Block: "Fahrplan für die Tram." Lëtzebuerger Journal, 22.10.2014, S.9
  3. Grënnungsakt op rcsl.lu, dem Internetsite vum Registre de Commerce et des Sociétés (gekuckt den 10. Februar 2017)
  4. 4,0 4,1 "Die Tramgesellschaft ist geboren." Luxemburger Wort 22.10.2014, S.21
  5. Première sortie du tram sous la pluie op wort.lu
  6. 6,0 6,1 "Vierte Tram-Erweiterung geplant." wort.lu, 23. Mäerz 2017 um 18:32.
  7. Video vum Transportministère op rtl.lu, 27.10.2016, 08:17:32
  8. "CAF aus Spanien erhält Zuschlag für die Straßenbahn in Luxemburg." Luxemburger Wort, 19. Mee 2015, S. 25
  9. "Den Tram ass do! 1. Rame ass zu Lëtzebuerg ukomm" rtl;Lu, 09.02.2017, 20:34:21