Place de l'Étoile (Stad Lëtzebuerg)

Vu Wikipedia
Wiesselen op: Navigatioun, sichen
Place de l'étoile
Luxembourg -place de l'Etoile, Stäreplaz - nom de rue.jpg
Numm lb: Stäreplaz
Gemeng Lëtzebuerg
Uertschaft Lëtzebuerg
Koordinaten 49° 36’ 48,0’’ N
     06° 07’ 11.3’’ O

D'Stäreplaz (offiziell: Place de l'Étoile) an der Stad Lëtzebuerg ass eng Plaz, oder éischter eng grouss Kräizung, wou d'Avenue Emile Reuter, d'Arelerstrooss, de Boulevard Grande-Duchesse Charlotte, de Boulevard de la Foire an d'Rue de Rollingergrund zesummekommen, mat zousätzlech der Rue François Boch an der Rue Jean-Pierre Probst e puer Meter méi wäit. Am Reseau vun den Nationalstroosse sinn et d'N51, d'N6 an d'N12, déi hei zesummekommen.

Si ass haut virun allem als eng grouss Broochfläch bekannt, wou an de leschte Joerzéngten Haiser ofgerappt goufen, mä déi Bauprojeten derhannert bis ewell (2017) net zustane komm sinn.

Geschicht[änneren | Quelltext änneren]

An den 1980er Jore gouf et Pläng, do eng Entrée fir en Tunnel tëscht dem Glacis an der Arelerstrooss unzeleeën, deen d'Autobunn op de Kierchbierg (déi haiteg Avenue Kennedy) besser un de Zougang zu där an d'Belsch ubanne sollt.[1] Doraus ass awer schlussendlech näischt ginn (eenzegt konkret Resultat vun deene Pläng ass d'Ënnerféierung ënnert dem Rond-Point Schuman). An déi Zäit fält den Ufank vum Opkaf vun den Terraine ronderëm d'Plaz, haaptsächlech duerch de Willy Hein, en Immobiliëpromoteur, deen eng sëlleche Citéen a Parkhaiser doruechter gebaut huet.

An den 1980er-90er Joren goufen ëmmer nees nei Projete virgestallt, fir eng Zort Visittekaart an der Entrée vun der Stad ze bauen. Sou gouf et en Architekteconcours, wou Maquettë vun den Entwërf am Neie Stater Theater ausgestallt goufen[Wéini ?]; et gouf Iwwerleeungen, d'Cité judiciaire dohin ze bauen, oder awer d'Chambre des métiers (1980), oder Sozialwunnengen (1991), oder de Gesondheetslaboratoire (1991), oder e Verwaltungsgebai (1999), ma näischt dovun gouf zeréckbehalen.

Parallel dozou goufe Grondstécker an Haiser opkaaft, verfalen an dann ofrappe gelooss, mat Dosende vu Prozesser déi dat ganzt begleet hunn. Net méi einfach gouf d'Saach doduerch, datt de Staat zwar an der Tëscht déi meescht - awer net all - Terrainen opkaaft hat, ma d'Stad Lëtzebuerg e Wiertchen iwwer Bebauungspläng a Baugeneemegunge matzeschwätzen hat, an de Staat och net onbedéngt selwer als Baupromoteur optriede wollt. All puer Joer huet e Politiker - Minister oder Buergermeeschter - ugekënnegt, dee "Schandfleck" géif elo endlech geschwë verschwannen, mä ouni Resultat.

2007 huet eng Immobilien-Investmentgrupp, Andromeda Investissement, am Partenariat mat Investoren aus dem Katar, dem Willy Hein, an engem Garagist, deen als eenzegen nach do gewunnt huet, hir Terrainen ofkaaft. Si wollten do en Akafszenter bauen, dat awer vum Gemengerot als ze flappeg verworf gouf. Nodeems de PAP an der Tëschenzäit g'ännert gi war, gouf e puer Joer drop en neie Projet vun Akafszentrum a Wunnenge geneemegt. Ma well Andromeda an den Hein - deen e puer Terrainen fir sech gehalen hat - goufe sech net eens, sou dass schlussendlech d'Katari sech zréckgezunn hunn. Well et och soss doruechter ëmmer méi Projete vun Akafszentre gouf, net zulescht de Royal Hamilius nobäi, ass dësen ongewëss.

2017 ass d'Situatioun esou, datt just zwéi Gebaier do stinn: op der Parzell F Büroe vun Axxa an op der Parzell E, 6 Appartementshaiser. Op de Parzellen A an D sinn ewell Büroen a Wunnenge geplangt, an op de Parzelle B an C weiderhin eng Akafsgalerie.

2018, am Laf vun den Ausbauaarbechte vum Stater Tram, gëtt eng Haltestell „Stäreplaz / Étoile“ a Betrib geholl an dernieft eng Busgare, fir tëscht deenen zwéin Transportmëttelen ëmzeklammen.[2]

Biller[änneren | Quelltext änneren]

D'Stäreplaz 2017:

Literatur[änneren | Quelltext änneren]

Um Spaweck[änneren | Quelltext änneren]

Commons: Place de l'Étoile (Stad Lëtzebuerg) – Biller, Videoen oder Audiodateien

Referenzen[Quelltext änneren]

  1. Quell zu dësem Kapitel, wou net anescht uginn: B. Thomas, Star Wars, an der Literatur.
  2. Jean-Michel Hennebert, Un pas de plus vers un premier tronçon plus long op paperjam.lu den 13. Juli 2017 (gekuckt den 10. Nov. 2017)