Clairefontaine-Plaz

Vu Wikipedia
(Virugeleet vu(n) Place de Clairefontaine)
Wiesselen op: Navigatioun, sichen
Place de Clairefontaine
Schëld Clairefontaine-Plaz.jpg
Numm lb: Schoulbierg[1]
fr: Place de Clairefontaine
Fréieren Numm de: Maximinplatz
Badenburgerstrasse / Bardenburgergasse
Gemeng Lëtzebuerg
Uertschaft Lëtzebuerg
Quartier Uewerstad
Postcode 1341
Koordinaten 49° 36’ 35.6’’ N
     06° 07’ 56.9’’ O
D'Clairefontaine-Plaz vun uewe gesinn (November 2009).
Gebaier op der Ostsäit vun der Plaz, mam Nobau vum Tuerm (1983-1984), deen zur zweeter Festungsmauer gehéiert hat, an dee bei "Restauratiounsaarbechten" an e Koup gefall ass. (Cf. d'Plack hei drënner).

D'Clairefontaine-Plaz, offiziell Place de Clairefontaine, ass eng Plaz an der Uewerstad vun der Stad Lëtzebuerg. Historesch gesinn, war et eng Strooss (Rue de Clairefontaine), déi d'Verbindug gemaach huet tëscht der Ënneschtgaass an der Hossegässel. An den 1980er Jore gouf de Quartier ëmgebaut, déi fréier Strooss gouf als Plaz ugeluecht an dat Ganzt gouf eng Foussgängerzon.

Um nord-westlechen Eck vun der Plaz läit den Hôtel Saint Maximin (dem Sëtz vum Ausseministère) an direkt donieft, den Hôtel de Bourgogne, an deem de Staatsminister säi Sëtz huet. Den Numm Clairefontaine huet d'Plaz vum Refuge vun der fréierer Abtei Clairefontaine, deen do stoung, an deen 1933 ofgerappt gouf.

D'Strooss huet fréier och nach Badenburgerstrasse oder Bardenburgergasse geheescht, als Iwwersetzung vu Clairefontaine. Ënner der däitscher Besatzung (1940 - 1944) huet d'Strooss Maximinplatz geheescht.

An der Mëtt vun der Clairefontaine-Plaz steet zanter 1990 e Monument zu Éiere vun der Groussherzogin Charlotte mat enger Skulptur vum Jean Cardot.

De véiereckegen Tuerm op der Ostsäit vun der Plaz, bei der Place du 6 juin 1937, huet zu der zweeter Festungsmauer gehéiert, déi vum Grof Giselbert ëm 1050 gebaut gouf. E gouf ufanks vum 17. Joerhonnert am Renaissance-Stil no uewen ausgebaut a war vun do u bewunnt, zesumme mat der Maison Mohr-de-Waldt niewendrun, déi ëm 1600 gebaut gouf. Den Tuerm an d'Haus goufen 1981 op d'Lëscht vun de klasséierte Monumenter agedroen. Enn 1982 ass den Tuerm, deem seng Fëllementer méintlaang fräigeluecht waren, an deen net ofgestäipt war, an e Koup gefall. Wat vun de Gebaier rescht war, gouf bis 1984 restauréiert, en nogebauten Tuerm huet den Originaltuerm ersat.[2]

Ënner der Plaz ass e Parking deen net ëffentlech zougängeg ass.

Literatur[änneren | Quelltext änneren]

  • Schmitt, Michel, 1990. La Place de Clairefontaine et son passé historique : un haut-lieu de la mémoire collective. S. 33-41 in: Regéierungscommissioun fir d'Monument, 1990. Monument Grande-Duchesse Charlotte : inauguration, le 29 avril 1990, Luxembourg, Place de Clairefontaine. [éd. Regéierungscommissioun fir d'Monument ; dir. Martin Gerges ; préface Jacques Santer]. 104 p. Impr. Centrale, Lëtzebuerg.

Fotoen[änneren | Quelltext änneren]

Kuckt och[änneren | Quelltext änneren]

Um Spaweck[änneren | Quelltext änneren]

Commons: Clairefontaine-Plaz – Biller, Videoen oder Audiodateien

Referenzen an Notten[Quelltext änneren]

  1. Luxembourg City Tourist Office, Toponoymie luxembourgeoise, „Plan Ville et environs“, 9e édition, 1999
  2. Cf. Plack op der Mauer nieft dem Tuerm; cf. och Jemp: "Den Tuerm as gefall." in: forum Nr.61 vum 29.1.1983, S.42.