Giovanni Schiaparelli

Vu Wikipedia
Wiesselen op: Navigatioun, sichen
De Giovanni Schiaparelli

Den Giovanni Virginio Schiaparelli, gebuer de 14. Mäerz 1835 zu Savigliano bei Cuneo, gestuerwen de 4. Juli 1910 zu Mailand, war en italieneschen Astronom. Vun 1864 bis 1900 war hie Direkter um Observatoire vu Mailand.

Weltbekannt gouf hien duerch seng Marsobservatiounen an duerch d'Entdeckung vun de sougenannte Marskanäl (Canali) am Joer 1877, wéi de Mars der Äerd besonnesch no koum. (Oppositioun). Dës réng linnefërmeg Strukture louchen no un der Siichtbarkeetsgrenz an hu speziell Observatiounserfahrung gebraucht. Eréischt am Joer 1879 gouf hir Entdeckung och vun aneren Astronome confirméiert.

De Schiaparelli huet si fir natierlech Rillen oder Flossbetter gehalen, awer op Englesch huet déi falsch Iwwersetzung Canals u Konschtbauten denken gelooss. Sou si Science-Fiction-Romaner entstanen an e joerzéngtlaange Mythos vu Marsmënschen. 1894 huet de Percival Lowell de Flagstaff-Observatoire am Arizona gebaut, fir d'Marskanäl an d'“Liewen“ um Mars z'erfuerschen.

Marsuewerflächekaart vum Schiaparelli

Eréischt am Joer 1965 schléissen Fotoe vun der US-Sond Mariner 4 déi Spekulatiounen aus. D'Marskanäl gëllen haut gréisstendeels als optesch Täuschung duerch Kontrasteffekter. Verschiddener sinn awer grouss Griechten oder Däller.

Astronomesch Fuerschunge vum Schiaparelli waren och de Merkur, d'Venus, d'Sonn an d'Duebelstären. E Krater um Äerdmound, um Merkur an um Mars goufen no him genannt. Hien huet och an enger präisgekréinter Aarbecht bewisen, datt de Meteorstroum vun de Perseiden (August-Stäreschnäizen) mat dem Koméit Swift-Tuttle vun 1862 zesummenhängt, an datt d'Leonide kleng Stécker vum Koméit Tempel-Tuttle sinn.

Weider huet hie sech mam Mars beschäftegt fir eng besser Nomenklatur anzeféieren an d'Verännerunge vun de rouden a gréng-groe Flächen, souwéi vun de wäisse Polkapen, z'ënnersichen.

Am Joer 1872 gouf hie mat der Goldmedail vun der Royal Astronomical Society ausgezeechent, an 1902, krut en d'Bruce Medail.

Literatur[änneren | Quelltext änneren]

  • Paul Raeburn: Mars : Die Geheimnisse des roten Planeten. Steiger Augsburg 2000.
  • William Sheehan: The Planet Mars : A History of Observation and Discovery. Tucson 1996.

Kuckt och[änneren | Quelltext änneren]

Saturn 01.svg Portal Astronomie

Um Spaweck[änneren | Quelltext änneren]