Eurovision Song Contest 1977


22. Eurovision Song Contest
Datum	7. Mee 1977
Stad	London (Groussbritannien)
Gebai	Wembley Conference Centre
Gewënner	Marie Myriam (Frankräich)
Zuel vu Länner	18
Nei Participatiounen	Keng
Moderatioun	Angela Rippon
Interval Act	Mr. Acker Bilk and his Paramount Jazz Men
Ofstëmmungsreegel	An all Land huet eng Jury 12, 10, 8, 7, 6, 5, 4, 3, 2 an 1 Punkt un déi zéng bescht Lidder verginn.

Den 22. Eurovision Song Contest war de 7. Mee 1977 a Groussbritannien. Organiséiert gouf d'Eurovisioun dat Joer am Wembley Conference Centre zu London. Presantatrice war d'Angela Rippon.

Am Ganzen hunn 18 Länner matgemaach, Jugoslawien, Malta an d'Tierkei waren net dobäi. Tunesien wollt och matmaachen, huet sech awer kuerzfristeg nees zeréckgezunn well Israel dobäi war.

Ursprénglech sollt de Grand Prix schonn den 2. Abrëll sinn, mä duerch e Streik vun de Kameramänner an Techniker ass en ëm 5 Woche verluecht ginn.

Verschidde Sänger ware scho virdru mol eng Kéier dobäi, d'Grupp The Swarbriggs fir Irland 1975, d'Michèle Torr fir Lëtzebuerg 1966, d'Ilanit fir Israel 1973, d'Patricia Maessen, d'Bianca Maessen an d'Stella Maessen (allen dräi Dream Express) fir Holland 1970 deemools als Hearts of Soul, d'Beatrix Neudlinger an de Günter Grosslercher (Schmetterlinge) fir Éisträich 1972 deemools als The Milestones, de Fernando Tordo (Os Amigos) fir Portugal 1973 an de Paulo de Carvalho (Os Amigos) fir Portugal 1974.

Et war och nees decidéiert ginn, dat all Interpret nëmmen a senger offizieller Sprooch däerft sangen, allerdéngs ass fir Däitschland an d'Belsch eng Ausnam gemaach ginn, well hiert Lidd scho selektionéiert war éier d'Reegel geännert gi war.

D'Reegel fir d'Ofstëmmung ass d'selwecht bliwwe wéi dat Joer virdrun: An all Land huet eng Jury 12, 10, 8, 7, 6, 5, 4, 3, 2 an 1 Punkt un déi zéng bescht Lidder verginn. D'Resultater si per Telefon op London matgedeelt ginn.

Déi éischt Plaz krut d'Vertriederin vu Frankräich, d'Marie Myriam, mat 15 Punkte Virsprong virum Lynsey de Paul a Mike Moran (Groussbritannien). Déi drëtt Plaz krut d'Grupp The Swarbriggs Plus Two, déi fir Irland ugetruede war.

Fir Frankräich war et déi fënneft Kéier datt et de Grand Prix gewonnen hat.

Klassement

Plaz	Land	Interpret	Titel	Punkten
1.	Frankräich	Marie Myriam	L'oiseau et l'enfant	136
2.	Groussbritannien	Lynsey de Paul & Mike Moran	Rock Bottom	121
3.	Irland	The Swarbriggs Plus Two	It's Nice to Be in Love again	119
4.	Monaco	Michèle Torr	Une petite française	96
5.	Griicheland	Pascalis, Marianna, Robert a Bessy	Mathema Solfege	92
6.	Schwäiz	Pepe Lienhard Band	Swiss Lady	71
7.	Belsch	Dream Express	A Million in One, Two, Three	69
8.	Däitschland	Silver Convention	Telegram	55
9.	Spuenien	Micky	Enseñame a cantar	52
10.	Finnland	Monica Aspelund	Lapponia	50
11.	Israel	Ilanit	Ahava hi shir lishnayim	49
12.	Holland	Heddy Lester	De mallemolen	35
13.	Italien	Mia Martini	Libera	32
14.	Portugal	Os Amigos	Portugal no coração	19
15.	Norwegen	Anita Skorgan	Casanova	18
16.	Lëtzebuerg	Anne-Marie B.	Frère Jacques	17
17.	Éisträich	Schmetterlinge	Boom Boom Boomerang	11
18.	Schweden	Forbes	Beatles	2

Um Spaweck

Den Haag (Holland)		Paräis (Frankräich)
ESC 1976	Eurovision Song Contest	ESC 1978