Nationalmonument vun der Onofhängegkeet

Nationalmonument vun der Onofhängegkeet
Typ	geographeschen Objet,; Monument
Land	Lëtzebuerg
Gemeng	Miersch
Adress	Rue Quatre-Vents, Miersch
Koordinaten	49°44'34,692"N, 6°5'16,296"O
Ageweit	7. Juni 1959

D'Nationalmonument vun der Onofhängegkeet, offiziell Monument national de l'indépendance, ass e Monument dat 1939, zur 100-Joer Feier vun der Onofhängegkeet vum Lëtzebuerger Land op engem Hiwwel um Flouer op Sannert, südwestlech vu Miersch opgeriicht gouf, deen zanterhier Krounebierg genannt gëtt.

Et gouf den 11. Januar 2024 als nationale Kulturpatrimoine klasséiert.^[1]

Plaz vum Monument

D'Monument steet um Krounebierg, 150 m westsüdwestlech vum Mierscher Camping an 200 m westlech vun der Mierscher Schwämm^[2] ewech. Vun der Mierscher Gare aus kann een an enger hallwer Stonn zu Fouss laanscht d'Uelzecht duerch de Mierscher Park trëppelen. Et ass e Parking direkt virum Monument. Vum Monument aus huet een eng schéi Vue op Miersch an Ëmgéigend.

D'Plaz gouf ausgewielt well si no um geographesche Mëttelpunkt vum Lëtzebuerger Land läit^[3].

Geschicht

Dat éischt Fräiheetsmonument huet aus enger héijer, zylindrescher Sail bestanen, op där eng grouss gëlle Kroun souz. Et gouf no de Pläng vum lëtzebuergeschen Architekt an Urbanist Henri Luja gebaut. D'Iddi war vum deemolege Buergermeeschter Ed Kraus ausgaangen, de Käschtepunkt louch bei 120.000 Frang. Et waren nach eng sëlleg Elementer op der Sail, dorënner Dekoratioune vum Stater Konschtschmadd Michel Haagen: 4 Wopen aus Bronze, eng Kroun, 4 Bänner aus Eecheblieder an eng bronze Plack mat dësem Text vum Mierscher Dichter Nik Welter:

1839 - 1939 AM HERZ VUM LAND HUET D'HERZ VUM VOLLEK DECH ERRÎCHT DU HUES A SONN A WAND OP HE'GEM TRO'N EIS FREIHETSKRO'N AN D'LÎCHT. DRO S'ÖNNER GOTTES HAND ALL SPE'DER ZEITEN DURCH ALS BIRGSCHÂFT FIR EIS LE'WT, ALS LO'N AN ÖNNERPAND FIR EISE GLAW UN DAUER A BESTAND VUM SCHE'NEN, FRIDDLECH FREIE LETZEBURG!

D'Monument gouf wéinst den onséchere politesche Verhältnesser kuerz virum Zweete Weltkrich ni ageweit. Den November 1940 gouf d'Monument vun den Nazi-Okkupanten ofgerappt. Ee Stéck vun der Sail ass deen eenzegen Iwwerrescht vun dësem éischte Monument, et steet haut um Parking virum haitege Monument.

Nom Enn vum Krich krut d'Mierscher Gemeng eng finanziell Entschiedegung fir d'Monument. Mat den zousätzleche Revenue vun enger Spendesammlung huet de Mierscher Gemengerot den Neibau vum Monument decidéiert, déi Kéier a Form vun engem Obelisk.

1957 gouf d'Monument nei ugeluecht no engem Konzept vum Henri Luja sengem Bouf, Paul Luja.

Déi grouss Plack mam Text vum Nik Welter an déi véier bronze Wopen, déi virun den Nazie konnte gerett ginn, goufen an de Sockel vum neie Monument agebaut. Dobäi koum eng nei bronze Plack op der viischter (südlecher) Säit vum Sockel mat follgendem Text vum Reckener Dichter Albert Elsen:

WAT 1940 ZU HIRER SCHAN BARBAREN EMGERASS,	HUN 1957 EIS LE'WT AN TREI ME' SCHE'N REM OPGERÎCHT.
DE BIERG BEHITT AN DE'WEM FRIDD EIS FREIHÉTSKRO'N AM HÈRZ VUM LETZEBURGER LAND. DRÊT EIS GEFOR LÎCHT SIE REM KLOR VUM HE'GEN TRON AN D'SE'L VU JIDDER HÉMECHTSKAND.

Dat neit Monument gouf de 7. Juni 1959 a Presenz vun de Ministere Pierre Grégoire^[4] a Robert Schaffner a vum Dechen Dr. Paul Kayser ageweit.

Am Mee 2009 gouf d'Nationalmonument vun der Onofhängegkeet fir d'lescht restauréiert^[5], nodeem de Blëtz^[6] Deeler vun der Sail beschiedegt hat.

Déi véier original Wopen um Monument

D'bronze Placken

Hënnescht Plack vun 1939
Viischt Plack vun 1959

Literatur

Luja, Henri, 1939: Monument National de l'Indépendance, Festschrift zur Kantonal-Jahrhundertfeier der Unabhängigkeit Luxemburgs zu Mersch am 23. Juli 1939: 16-17. Mersch.
Lang, Ben: Der Obelisk vom "Krounebierg" - Reise zum Mittelpunkt des Landes, am Luxemburger Wort vum 9. November 2015, S.15

Kuckt och

Onofhängegkeetsmonument vun 1939 zu Beidler

Um Spaweck

Commons: Nationalmonument vun der Onofhängegkeet – Biller, Videoen oder Audiodateien

Referenzen an Notten

↑ Institut national pour le patrimoine architectural: Liste des immeubles et objets bénéficiant d'une protection nationale. (Lescht Versioun vum 3. Juli 2024).
↑ Krounebierg heescht och den neien Aquazenter vu Miersch mat Schwämm a Wellnessberäich, cf. d'Websäit vum Aquazenter op www.krounebierg.lu
↑ Den eigentleche Mëttelpunkt vum Land no der Schwéierpunktmethod läit am Naturschutzgebitt Pëttenerbësch, am Nordweste vu Pëtten. Kuckt duerzou Geographeschen Zentrum vu Lëtzebuerg. Well déi Plaz sech fir sou en imposant Monument net gëeegent war, ass den Hiwwel ausgewielt ginn, deen haut Krounebierg heescht.
↑ Den deemolege Kulturminister (oder méi richteg Wëssenschafts- a Konschtminister) Pierre Grégoire war net richteg informéiert an huet gemengt, et wier e Monument zu Éiere vu Lëtzebuerger, déi fir d'Heemecht gefale waren, entspriechend Zitater hat hien a senger Ried agebaut.
↑ Knapps zwéi Méint drop sinn d'Deckele vun der Beliichtung schonn opgeschloen an d'Biere geklaut ginn.
↑ Um Bild uewe sinn déi nei Blëtzofleeder ze gesinn.

[1] Institut national pour le patrimoine architectural: Liste des immeubles et objets bénéficiant d'une protection nationale. (Lescht Versioun vum 3. Juli 2024).

[2] Krounebierg heescht och den neien Aquazenter vu Miersch mat Schwämm a Wellnessberäich, cf. d'Websäit vum Aquazenter op www.krounebierg.lu

[3] Den eigentleche Mëttelpunkt vum Land no der Schwéierpunktmethod läit am Naturschutzgebitt Pëttenerbësch, am Nordweste vu Pëtten. Kuckt duerzou Geographeschen Zentrum vu Lëtzebuerg. Well déi Plaz sech fir sou en imposant Monument net gëeegent war, ass den Hiwwel ausgewielt ginn, deen haut Krounebierg heescht.

[4] Den deemolege Kulturminister (oder méi richteg Wëssenschafts- a Konschtminister) Pierre Grégoire war net richteg informéiert an huet gemengt, et wier e Monument zu Éiere vu Lëtzebuerger, déi fir d'Heemecht gefale waren, entspriechend Zitater hat hien a senger Ried agebaut.

[5] Knapps zwéi Méint drop sinn d'Deckele vun der Beliichtung schonn opgeschloen an d'Biere geklaut ginn.

[6] Um Bild uewe sinn déi nei Blëtzofleeder ze gesinn.

[1]

[2]

[3]

[4]

[5]

[6]