Eurovision Song Contest 1999

Vu Wikipedia
Wiesselen op: Navigatioun, sichen
44. Eurovision Song Contest
Datum 29. Mee 1999
Stad Jerusalem (Israel)
Gebai International Convention Centre
Gewënner Charlotte Nilsson (Schweden)
Zuel vu Länner 23
Nei Participatiounen Keng
Moderatioun Yigal Ravid, Dafna Dekel a Sigal Shahamon
Interval Act Dana International mam Titel "Free"
Ofstëmmungsregelung All Land huet 12, 10, 8, 7, 6, 5, 4, 3, 2 an 1 Punkt un déi zéng bescht Lidder verginn.
D'Gewënnerin Charlotte Nilsson, 2008
International Convention Centre zu Jerusalem, 2006

De 44. Eurovision Song Contest war den 29. Mee 1999 an Israel. Organiséiert gouf d'Eurovisioun dat Joer am International Convention Centre zu Jerusalem. Presentateure waren de Yigal Ravid, d'Dafna Dekel an d'Sigal Shahamon. D'Dafna Dekel war 1992 als Interpretin fir Israel ugetrueden.

Fir d'Zuel vun de Länner ze reduzéiere sinn d'Plaze vun de leschte 5 Joer gekuckt ginn an déi mat de mannste Punkte hu missen e Joer Paus maachen. Betraff vun dëser Regel ware Finnland, Griicheland, Mazedonien, Rumänien an d'Schwäiz . Lëtzebuerg huet scho wéi déi 5 Joer virdrun fräiwëlleg drop verzicht fir matzemaachen. Och Italien, Ungarn a Russland hu fräiwëlleg net matgemaach. Am Ganze waren 23 Länner dobäi.

Verschidden Interprete ware scho virdrun emol eng Kéier dobäi, d'Doris Dragović fir Kroatien 1986 (fir Jugoslawien) an d'Darja Švajger fir Slowenien 1995.

Nodeem Norwegen sech dat Joer virdrun (1998) beschwéiert hat, se hätte Problemer gehat fir Sponsoren ze fannen, ass zur besserer Finanzéierung d'Big-4 Regel agefouert ginn, wat praktesch bedeit, datt déi véier Länner Däitschland, Groussbritannien, Frankräich a Spuenien ëmmer matmaachen däerfen, egal wéi se déi Jore virdrun ofgeschnidden hunn.

Eng weider Ännerung ass et gëtt, wat d'Sprooch vun de Lidder ubelaangt. Vun dësem Joer u war et nees erlaabt, d'Sprooch fräi ze wielen. Bis dohi war nëmmen déi offiziell Sprooch (oder eng vun den offizielle Sproochen) vun dem jeeweilege Land erlaabt.

Vun dësem Joer u war och d'Begleedung vun den Interpreten duerch en Orchester net méi obligatoresch. An Israel ass dofir decidéiert ginn, keen Orchester virzegesinn. D'Begleetmusek ass vun engem Band komm, d'Interpreten hunn awer live gesongen.

D'Regel fir d'Ofstëmmung ass d'selwecht bliwwe wéi déi Jore virdrun, allerdéngs ass an de meeschte Länner den Televoting duerch d'Spectateure benotzt gi fir ofzestëmme mat Ausnam vun der Tierkei, Bosnien an Herzegowina, Irland a Litauen, wou nach eng Jury d'Ofstëmmung gemaach huet. All Land huet duerch d'Ofstëmmung 12, 10, 8, 7, 6, 5, 4, 3, 2 an 1 Punkt un déi zéng bescht Lidder verginn. D'Resultater si per Telefon op Jerusalem matgedeelt ginn.

Déi éischt Plaz krut d'Vertriederin vu Schweden, d'Charlotte Nilsson mat 17 Punkte Virsprong virum Selma Björnsdóttir (Island). Déi drëtt Plaz krut d'Grupp Sürpriz, déi fir Däitschland ugetruede war.

Fir Schweden war et déi véiert Kéier datt et de Grand Prix gewonnen hat.

Klassement[änneren | Quelltext änneren]

Plaz Startnr. Land Interpret Titel Punkten
01. 15 Schweden Charlotte Nilsson Take Me to Your Heaven 163
02. 13 Island Selma Björnsdóttir All out of Luck 146
03. 21 Däitschland Sürpriz Reise nach Jerusalem – Kudüs’e seyahat 140
04. 04 Kroatien Doris Dragović Marija Magdalena 118
05. 19 Israel Eden Happy Birthday (Yom huledet) 093
06. 23 Estland Evelin Samuel & Camille Diamond of Night 090
07. 22 Bosnien an Herzegowina Dino & Béatrice Putnici 086
08. 09 Dänemark Michael Teschl & Trine Jepsen This Time 071
08. 11 Holland Marlayne One Good Reason 071
10. 18 Eisträich Bobbie Singer Reflection 065
11. 06 Slowenien Darja Svajger For a Thousand Years 050
12. 02 Belsch Vanessa Chinitor Like the Wind 038
12. 05 Groussbritannien Precious Say It Again 038
14. 08 Norwegen Stig André Van Eijk Living My Life Without You 035
15. 20 Malta Times Three Believe ’n Peace 032
16. 07 Tierkei Tugba Önal & Grup Mystik Dön artık 021
17. 17 Irland The Mullans When You Need Me 018
18. 12 Polen Mietek Szczesniak Przytul mnie mocno 017
19. 10 Frankräich Nayah Je veux donner ma voix 014
20. 01 Litauen Aistė Smilgevičiūtė Strazdas 013
21. 16 Portugal Rui Bandeira Como tudo comerçou 012
22. 14 Zypern Marlain Angelidou Tha’ne erotas 02
23. 03 Spuenien Lydia No quiero escuchar 01

Déi rout markéiert Länner hunn am Joer drop (2000) wéinst hirem schlechte 5-Jores-Duerchschnëtt missen aussetzen.

Um Spaweck[änneren | Quelltext änneren]

Commons: Eurovision Song Contest 1999 – Biller, Videoen oder Audiodateien
Birmingham (Groussbritannien) Esc-wäiss1.png Stockholm (Schweden)
ESC 1998 Eurovision Song Contest ESC 2000