École privée Notre-Dame Sainte-Sophie

D'École privée Notre-Dame Sainte-Sophie, meeschtens einfach Sainte-Sophie genannt, ass eng lëtzebuergesch Privatschoul um Weimeschhaff.

Inhaltsverzeechnes

Dat fréiert Klouschter

1627 hunn d'Schwëstere vun der Congrégation Notre-Dame^[1] vu Metz ^[2] e Klouschter an der Stad Lëtzebuerg opgemaach an eng Primaire-Schoul fir Meedercher gegrënnt. D'Schoul war gratis an d'Schoulmaterial gouf vun de Schwëstere gestëft. Dat deemolegt Klouschter war un déi haiteg Dräifaltegkeetskierch ugebaut.
1793, wärend der franséischer Revolutioun, gouf d'Klouschter opgeléist an d'Gebaier ëffentlech versteet.
1808 koumen d'Schwësteren zréck op Lëtzebuerg an hunn am September hir Schoul nees opgemaach. E Pensionnat fir Meedercher koum bei d'Schoul dobäi.
1810 installéiert d'Kongregatioun sech am fréiere Refuge vun de Benediktiner vu Münster, am Haus Gerden, an der rue de la Trinité (haut rue de la Congrégation).
Am Laf vum 19. an am Ufank vum 20. Joerhonnert gouf d'Schoul ausgebaut. Bei d'Primaire-Schoul koumen dobäi:
- 1835 eng Schoul fir d'Ausbildung fir Aarbechterinnen (École ouvrière);
- 1845 eng École normale (spéider Cours supérieurs genannt), mat Pensionnat, fir d'Ausbildung vu Léierinnen;
- 1863 eng Oberprimaire-Schoul (École primaire supérieure);
- 1915 eng Secondaire-Schoul (École d'enseignement moyen) fir Meedercher, mat engem Schoulprogramm dee konform war mat deem vun de staatleche Meedercheslycéeën. 1917 hunn déi éischt Meedercher aus der Sainte-Sophie hire Premières-Exame gemaach.

Vun 1941 bis 1944 war d'Schoul zou.
Am September 1944, no der Liberatioun, hunn d'Primaire- an d'Secondaireschoulen hir Dieren nees opgemaach. Déi aner Course goufen net méi ugebueden.
1950 koum de Cours Alix dobäi, mat enger Ausbildung an der Haushaltskunde (enseignement ménager) an dem Commerce (formation commerciale). De Cours Alix huet bis 1965 bestanen.
1972 ass d'Sainte-Sophie an dat neit Gebai op de Weimeschhaff geplënnert.
1979 gouf d'Mixitéit an der Schoul agefouert.
1982 huet d'Schoul eng Konventioun mam Staat ënnerschriwwen op der Basis vum Gesetz vum selwechte Joer (Loi du 31 mai 1982 sur les relations entre l'État et l'enseignement postprimaire privé).
1987 gouf den Enseignement secondaire technique an der Schoul agefouert.
1998 hunn d'Schwësteren zesumme mat der Schoul-Communautéit de 400. Anniversaire vun der Grënnung vun der Congrégation Notre-Dame gefeiert.
1999 bis 2001 gouf d'Schoulgebai um Weimeschhaff eng éischt Kéier ausgebaut: ënner anerem koumen 13 Klassesäll a Spezialsäll dobäi.
2005 krut d'Schoul eng Charte scolaire.
2007 ass d'École française, mat enger Section élementaire an enger Section maternelle, opgaangen. Datselwecht Joer hunn d'Schwësteren opgehalen an der Schoul z'enseignéieren.
2009 gouf e neie Fligel ageweit, mat 15 Klassesäll fir déi lëtzebuergesch a franséisch Primaire-Schoulen.^[3]

Édouard Molitor, 1977. 350 Jahre Kongregation Unserer Lieben Frau (Sainte Sophie). Luxemburger Wort 236 (1977), S. 7.
Paul Margue, 1979. La Congrégation Notre-Dame 1627-1977. Aperçu historique. Écho de Sainte-Sophie (1979), S. 22-30.
Gilles Sibenaler, 2009. Neuer Gebäudeflügel der "Ecole privée Notre-Dame" (Sainte-Sophie). Luxemburger Wort, 5. Dezember 2009, S. 25.