Helsinki

Helsinki
Land	Finnland
Vewaltungseenheet	Uusimaa
Buergermeeschter	Daniel Sazonov
Awunner	694.392
	31. Dezember 2025
Fläch	214,42 km²
Héicht	17 m
Koordinaten	60°10'15"N, 24°56'15"O
Telefonszon	09
Postcode	00100–00990
Websäit	https://hel.fi

D'Festung Suomenlinna vum Mier aus gesinn

Kaart vun Helsinki (Ufanks vum 20. Joerhonnert)

Helsinki ( Helsinki ^{? / i}, sv. Helsingfors ^{? / i}) ass d'Haaptstad vu Finnland an de Chef-lieu vun der Regioun Uusimaa. Se huet 694.392 Awunner (Stand 31. Dezember 2025) an ass 214,42 km² grouss; d'Bevëlkerungsdicht läit deemno bei 3.238,47 Awunner / km².

Zesumme mat den Nopeschstied Espoo, Vantaa a Kauniainen bilt Helsinki déi sougenannt Haaptstadregioun (fi. Pääkaupunkiseutu, sv. Huvudstadsregionen), eng Metropolregioun mat ongeféier 1,3 Millioune Awunner, wat se zur nërdlechster Metropolregioun mat iwwer enger Millioun Awunner op der Welt mécht.

Nodeem zirka 6 % vun der Bevëlkerung schweedesch als Mammesprooch hunn, ass d'Stad, dem finneschem Gesetz no, offiziell zweesproocheg.

Geographie

D'Stad läit an der Regioun Uusimaa am Süden vum Land, um finnesche Golf. Helsinki ass déi nërdlechst Haaptstad vun engem EU-Memberstaat.

Helsinki läit 80 km nërdlech vun Tallinn an Estland, 400 km ëstlech vu Stockholm a Schweden an 300 km westlech vu Sankt Péitersbuerg a Russland.

Geschicht

Helsinki gouf 1550 op Uerder vum schweedesche Kinnek Gustav Vasa I. gegrënnt fir der - deemools russescher - Hafestad Reval (haut Tallinn) Konkurrenz op den hollännesch-russeschen Handelsrouten an der Ostmierregioun ze maachen. Nodeem d'Schweden awer schonn e puer Joer drop (1561) Estland, an domat och Reval, ënner hir Kontroll kruten, hat de Projet Helsinki zanterhier keng Prioritéit méi fir d'schweedescht Kinnekshaus.

Ongënschteg fir d'Entwécklung vun de Siidlunge war och hir geographesch Lag. 1640 gouf Helsinki op Decisioun vum schweedesche Verwalter dofir kuerzerhand méi no un d'Mier, bei d'Mëndung vum Floss Vantaa, geréckelt. Nodeem d'Russen am Laf vum 18. Joerhonnert zweemol d'Stad ageholl haten, gouf 1748 d'Festung Suomenlinna opgeriicht. All déi Zäit war Helsinki awer ni méi wéi eng kleng Provenzstiedchen an nach ufanks vum 19. Joerhonnert hat d'Stad nëmmen ëm déi 4.000 Awunner.

1808 gouf Finnland vum russeschen Zar Alexander I. eruewert. Fir de schweedeschen Afloss an der Regioun nach weider ze reduzéieren, huet den Zar d'Haaptstad 1812 - vum elo russesche Groussherzogtum Finnland - vun der traditionell schweedesch dominéierter Stad Turku op Helsinki verleeë gelooss. Helsinki hat och de Virdeel, datt et méi no bei Sankt Péitersbuerg louch. Nodeem d'Stad 1809 zu zwee Drëttel duerch e grousst Feier zerstéiert gi war, hunn d'Russen den Zentrum vun Helsinki komplett nei, am monumental-klassizisteschem Stil, opbaue gelooss. Eng ganz Rei Gebaier, wéi z. B. den Doum, goufen deemools no Pläng vum däitschen Architekt Carl Ludvig Engel realiséiert.

1819 gouf de Sëtz vum finnesche Senat op Helsinki geplënnert an zanter 1918 ass et d'Haaptstad vun der onofhängeger Republik Finnland.

Helsinki war 1952 Organisateur vun den Olympesche Summerspiller.

Bevëlkerungsentwécklung

Nom Zweete Weltkrich ass Helsinki séier gewuess. D'Groussstad ass haut den Zentrum vun enger Agglomeratioun an där ëm déi 1,3 Millioune Leit wunnen.

Entwécklung vun der Awunnerzuel vun Helsinki (1875–2025)

D'Awunnerzuele si vu Wikidata iwwerholl ginn

Kuckeswäertes

Den Doum vun Helsinki

Monumenter a Gebaier

• Den Doum vum Architekt Carl Ludvig Engel
• D'orthodox Uspenski-Kathedral
• D'Finlandia-Hal vum Architekt Alvar Aalto
• D'Haaptgebai vun der Universitéit Helsinki
• D'finnesch Nationaloper
• Den Olympiastadion
• D'Festung Suomenlinna (op Schweedesch: Sveaborg) aus dem 18. Joerhonnert steet op der UNESCO-Lëscht vum Weltierwen

Muséeën

• Kiasma - Musée fir modern Konscht

Um Spaweck

Commons: Helsinki – Biller, Videoen oder Audiodateien

• Offiziell Websäit vun Helsinki