Hunneg-Strëpp
| Hunneg-Strëpp | |
|---|---|
 D'Hunneg-Strëpp no engem Optrëtt 2022 zu Mamer. | |
| Museksgenre | Brassband |
| Land | Lëtzebuerg |
| Grënnung | 2017 |
| Websäit | www.hunnegstrepp.lu |
| Aktuell Memberen | Donven Mike, Jacoby Svenja, Karier Tom, Kugener Paul, Lucas Ben, Lucas Max, Lucas Pit, Schol Davina |
| Fréier Memberen | Kaufmann Luc |
 | |
Hunneg-Strëpp ass eng Brassband aus Lëtzebuerg, déi am Joer 2017 gegrënnt gouf[1]. Si si bekannt fir hir energetesch Live-Shows, sou wéi fir hir eklektesch Interpretatioune vun Lidder aus verschiddene Genren. Den Numm „Hunneg-Strëpp“ entspéngt aus engem Wuertspill, dat déi 2 Wierder Hunneg-Drëpp a Strëpp (e klenge Bléisersensemble) matenee verbënnt.
Geschicht
[änneren | Quelltext änneren]2017 gouf d'Formatioun vun enger Grupp vu Kollege gegrënnt, déi och schonn an engem anere Museksveräin zesumme gespillt hunn, der Harmonie Klengbetten.[2] Hiren éischten Optrëtt hat d'Hunneg-Strëpp am Kader vum ING Marathon. Doropshin huet d'Band éischter kleng akustesch Concerte duerch ganz Lëtzebuerg gespillt. Iwwert d'Joren hu si hir Concerten zu verstäerkte Shows entwéckelt a sinn ënner Anerem op der Fête de la Musique, dem Food for your Senses an dem e-Lake opgetrueden, grad esou wéi a bekannte Lëtzebuerger Concertshäiser wéi am Atelier, an der Luxexpo the Box, an der Kulturfabrik an an der Rockhal. Haut hu si wäit iwwer 100 Optrëtte op hirem Palmarès.[3]
Genre a musikalesch Aflëss
[änneren | Quelltext änneren]Der Hunneg-Strëpp hirt Markenzeeche sinn hir Coveren, also Reinterpretatioune vu bekannte Lidder, an deene si déi verschiddenste Musekrichtunge matenee kombinéieren. Dës genre-iwwergräifend Approche erlaabt et dem Grupp, e breet Publikum unzespriechen, andeems si hir Wuerzelen aus der klassescher Blosmusek mat Hip-Hop, modernem Pop, Rock an elektronescher Musek kombinéieren. Hir Aflëss reeche vun anere bekannte Brassbands wéi Meute, Querbeat oder de Fäaschtbänkler bis zu internationale Bands an DJen.
Memberen
[änneren | Quelltext änneren]D'Band besteet haut aus 8 Memberen:[Source?][4]
- Mike Donven: Saxophon Tenor
- Svenja Jacoby: Trompett
- Paul Kugener: Tuba/Helikon
- Tom Karier: Batterie
- Ben Lucas: Trombonn
- Max Lucas: Trompett, Gesang
- Pit Lucas: Saxophon Alto & Saxophon Baryton
- Davina Schol: Querflütt & Percussion
Kollaboratioune
[änneren | Quelltext änneren]D'Hunneg-Strëpp ass virun allem eng Live-Band. Op de soziale Medien fënnt een allerdéngs eng Rei Live-Videoen[5].
Si kollaboréiere reegelméisseg mat bekannte Lëtzebuerger Museker. Duerch hier Concert-Serie „Hunneg-Strëpp & Friends“, wou si zesumme mat Lëtzebuerger Artisten optrieden, hu si och Lëtzebuerger Cover-Songs an hirem Set. Déi éischt Editioun vun dëser Serie war 2019 am Kader vum 125. Anniversaire vun der Harmonie Klengbetten. Déi 2. Editioun, a gläichzaïteg hiren 100. Concert war am am Mäerz 2024 an der ausverkaafter Escher Kulturfabrik.[2]
Artisten, mat deene si schonn zesummen gespillt hunn a reegelméisseg optrieden, sinn: Mutiny on the Bounty, De Läb, Maz, Versus You, Serge Tonnar, Seed to Tree, Jérôme Klein, Schëppe Siwen, No Metal in this Battle, The Disliked, Georges Sadeler, Pol Belardi, Claire Parsons a Victor Kraus.
Am Joer 2022 ware si nominéiert fir e Lëtzebuerger Musekspräis an der Kategorie „Fräizäitmusek“, organiséiert vum Kulturministère. Aner Nominatioune ware fir d'Big Band Opus 78, de Festival Koll an Aktioun, den Orchestre National des Jeunes a Luxembourg Philharmonia [6].
Referenzen
[Quelltext änneren]- ↑ Abschnitt „About“ vun der offizieller Websäit
- ↑ 2,0 2,1 (de)„Bei uns sind auch Keyboard und Gitarre willkommen“: Harmonie Kleinbettingen feiert 125. Jubiläum. Gekuckt de(n) 2024-11-20.
- ↑ (de)Konzert / Blasmusik in ihrer coolsten Form: „Hunneg-Strëpp“ spielt am Freitag in der Escher Kufa. Gekuckt de(n) 2024-11-20.
- ↑ Dossier-de-presse-HS_2023.pdf. Google Docs. Gekuckt de(n) 2024-11-20.
- ↑ Hunneg-Stëpp op youtube
- ↑ (fr)Publication des shortlists des Lëtzebuerger Musekspräisser. gouvernement.lu (2022-11-22). Gekuckt de(n) 2024-11-02.