Centre Émile-Hamilius

Vu Wikipedia
(Virugeleet vu(n) Centre Hamilius)
Op d'Navigatioun wiesselen Op d'Siche wiesselen
De Centre Hamilius vun der Aldréngerstrooss aus gesinn. (Dezember 2011).
Vum Boulevard Royal aus gekuckt. D'Skulptur vun der Niki de Saint Phalle gouf kuerz virdrun ewech geholl. (Dezember 2011).
D'Fassad nieft der Haaptentrée vum Gebai am Dezember 2011.

De Centre Émile-Hamilius war e Verwaltungsgebai vun der Stad Lëtzebuerg, am Zentrum vun der Stad, op der Plaz mam selwechten Numm (place Émile-Hamilius), tëscht dem Boulevard Royal an der rue Aldringen. De Centre Hamilius an d'Plaz goufen nom Émile Hamilius, dem fréiere Buergermeeschter (1946-1963) vun der Stad, genannt.

Bekannt war d'Gebai virun allem wéinst dem Bierger-Center vun der Stad, deen do vun 2001 bis Enn 2011 funktionéiert huet, an och der Stater Bibliothéik (vun 1978 bis 2008). Am Gebai gëtt et Mëtt Dezember 2011 just nach e Kommissariat vun der Police grand-ducale. 2012 gouf dat dunn a Containeren op der Theaterplaz ënnerbruecht bis et 2013 an nei Raimlechkeeten an d'Rue du Fossé (Um Gruef) geplënnert ass.

D'Skulptur La grande tempérance, aus der Serie vun den Nanas vun der Niki de Saint Phalle huet zanter 1995, op der Säit vum Boulevard Royal, zum Cachet vum Gebai bäigedroen[1].

D'Gebai huet 1977 seng Dieren opgemaach a gouf den 9. Mäerz 1979 offiziell ageweit[2]. Am Fréijoer 2015 gouf et zesumme mat zwee Nopeschgebaier ofgerappt fir duerch de Komplex Royal-Hamilius ersat ze ginn.

D'Gebai[änneren | Quelltext änneren]

De Centre Hamilius huet aus engem Tuerm mat 9 Stäck an zwéi Säitefligele mat jee 4 a 6 Stäck bestanen. Dobäi koume véier ënnerierdesch Stäck, wouvun der zwéin als Parking fir d'Gemengebeamte benotzt goufen.

Den Zweck vum Bau war fir eng Rëtsch iwwer d'Stad verstreet Gemengeservicer ze regruppéieren, déi virdrun hir Büroen am Zerkel, a Gebaier um Lampertsbierg, an der Jean-Pierre-Brasseur-Strooss um Belair, an der Escher-Strooss, der Helleg Geescht-Strooss, der Neipuertsgaass, dem Boulevard Roosevelt, der Biedergaass an der Avenue Émile-Reuter haten.

D'Gebai hat 230 Millioune LUF (zirka 5,7 Milliounen Euro, ouni d'Inflatioun mat anzerechnen) kascht. Am Ganzen hat et eng Fläch vu ronn 10.000 déi ausgenotzt konnte ginn.

Am Laf vun de Jore gouf sech iwwer déi schlecht thermesch an akustesch Isolatioun vum Gebai beklot[3].

Et hätt sollen Enn 2012 zesumme mat Nopeschgebaier ofgerappt ginn, fir duerno duerch de Centre Royal-Hamilius ersat ze ginn. D'Ofrappe gouf awer bis an d'Fréijoer 2015 no hanne verréckelt.

Den 8. Dezember 2011 gouf La grande tempérance, aus der Serie vun den Nanas vum Niki de Saint Phalle, ofmontéiert fir am Depot vum Nationalmusée fir Geschicht a Konscht deposéiert ze ginn. 2017, nom Ofschloss vum Chantier vum neie Gebai, soll s'erëm op hir Plaz zréckkommen[1].

Den 9. Dezember 2011 huet de Bierger-Center seng Dieren am Centre Hamilius zougemaach, fir se Méindes den 13. Dezember 2011 an engem Gebai vis-à-vis, um Boulevard Royal, nees opzemaachen. Zënter dem 1. Juli 2014 ass de Bierger-Center am Centre Guillaume II, dem fréiere Veräinshaus um Knuedler[4].

De Projet Royal-Hamilius[änneren | Quelltext änneren]

De Schantjen, am Februar 2016.

Virun 2011 huet d'Stad Lëtzebuerg déi zwéi Nopeschgebaier (en drëtt Gebai bleift a Privatbesëtz) am ganzen Haiserblock vum Centre Hamilius opkaaft. Nom Ofrappe vun deenen dräi Gebaier, entsteet op där Plaz, vun 2015 un, de Centre Royal-Hamilius. Am neien Zenter sinn, ausser Büroen, och Geschäfter a Restaurante virgesinn. Gewënner vum Concours fir den neien Immeubel war de Projet vum briteschen Architektebüro Foster + Partners.

Nuvola apps xmag.png Méi Informatioun doriwwer am Artikel: Royal-Hamilius

Literatur[änneren | Quelltext änneren]

  • Hansen, J., 2014. L'hypercentre change. Quarante ans après son érection, le « centre civique Jean Hamilius » fait place à une nouvelle construction. Un adieu. d'Lëtzebuerger Land vum 19. Dez. 2014, Nr. 51/52, S. 6.
  • hip/raz, 2011. « Nana » wartet vorübergehend im Depot. Skulptur von Niki de Saint Phalle in der Hauptstadt entfernt. Luxemburger Wort vum 9. Dezember 2011, S. 28.
  • Zwank, R., 2011. Wichtige Dienststelle der Hauptstadt ab Dienstag an neuer Adresse. "Biergerzenter" zieht um. Luxemburger Wort vum 68 Dezember 2011, S. 29.
  • r.cl. (René Clesse), 2001. De Bierger-Center vun der Stad ass op! ons stad 68 (2001), S. 1. PDF
  • Anonyme, 1979. Centre Emile Hamilius: das neue hauptstädtische Verwaltungszentrum. ons stad 2 (1979), S. 23-25. PDF

Kuckt och[änneren | Quelltext änneren]

Um Spaweck[änneren | Quelltext änneren]

Commons: Place Émile Hamilius – Biller, Videoen oder Audiodateien

Referenzen an Notten[Quelltext änneren]

  1. 1,0 1,1 Luxemburger Wort vum 9. Dezember 2011, S. 28
  2. ons stad 2 (1979) S. 23.
  3. ons stad 2 1979, S. 24.
  4. Websäit vun der Stad Lëtzebuerg