Rue du Fossé (Stad Lëtzebuerg)

Rue du Fossé
Numm	lb: Um Gruef; fr: Rue du Fossé
Fréieren Numm	fr: Rue Guillaume (bis 1925); de: Auf dem Graben
Längt	ca. 200 m
Land	Lëtzebuerg
Gemeng	Lëtzebuerg
Uertschaft	Lëtzebuerg
Quartier	Uewerstad
Postcode	1536
Koordinaten	49° 36’ 39’’ N; 06° 07’ 54’’ O

D'Rue du Fossé (um Gruef) ass eng Strooss am Zentrum vun der Stad Lëtzebuerg.

D'Strooss leeft ongeféier a süd-nërdlecher Richtung an ass zirka 200 m laang. Am Süde geet se fort vun der Place de Clairefontaine, do wou d'Ënneschtgaass (rue Notre-Dame) an d'Waassergaass (rue de l'Eau) openeestoussen. Am Norde geet d'Rue du Fossé bis op d'Groussgaass. Op der anerer Säit vun der Groussgaass geet et weider a Richtung Norde mat dem Eecher Bierg (Côte d'Eich).

Hiren Numm krut se well s'iwwer de Gruef gebaut gouf, dee virun der zweeter Festungsmauer gelaf ass^[2].

Ënner der däitscher Besatzung (1940 - 1944) huet d'Strooss Auf dem Graben geheescht^[3].

Biller

Eck Knuedler a Rue du Fossé: D'Gebuertshaus vum Edmond de la Fontaine
Um Gruef, zu der Zäit vum Oktav-Mäertchen

1933

1933 gouf de Gruef méi breet gemaach. Domat sollt d'Alstad un de Confrot an d'Hygiène vun der neier Stad aus dem 19. Joerhonnert ugepasst ginn. Déi architektonesch Interventioun an den Tissus historique gouf vun der Obermosel-Zeitung deemools als Dokument neuzeitlicher Baukunst a Beweis Luxemburger Leistungsfähigkeit duergestallt.

Ausgruewungen 2012/13

2012 an 2013, wéi de Stroossebelag an déi ënnerierdesch Infrastrukturen erneiert goufen, koume Fëllementer vun enger Baussemauer vum Franziskanerklouschter an och, op enger Fläch vu 5 m op 5 m, véier Skeletter zum Virschäin. D'Skeletter konnte bis elo (Stand Mäerz 2013) nach net méi genee datéiert ginn, wéi datt s'aus enger Zäit stamen déi vum Mëttelalter bis an d'17. Joerhonnert geet.^[4]

Archeologesch Gruewungen an der Rue du Fossé. D'Kamera kuckt a Richtung Clairefontainesplaz.
Ausgruewungen am ieweschten Deel vun der Strooss. D'Kamera kuckt a Richtung Groussgaass (Oktober 2013).
Idem