Zéisseng

Vu Wikipedia
Wiesselen op: Navigatioun, sichen
Zéisseng an der Gemeng Lëtzebuerg
D'Sportshal
De Centre Culturel

Zéisseng (däitsch: Zessingen, franséisch: Cessange) ass ee vun de gréisste Quartiere vun der Stad Lëtzebuerg. E läit am Süd-Weste vun der Stad.

Geographie[änneren | Quelltext änneren]

Zéisseng läit tëscht de Quartiere Gaasperech, Hollerech a Märel op der Gemengegrenz mat der Gemeng Leideleng. Süd-westlech vun Zéisseng kräizt sech d'Autobunn A4 mat der A6 um Zéissenger Kräiz.

Zéisseng huet eng total Fläch vu 658 Hektar, wat 14 % vun der ganzer Fläch vun der Stad Lëtzebuerg ausmécht. Et sinn nëmme 70 ha als Besidelungsfläch benotzt. Zéisseng huet eng Kierch, e Centre Culturel, eng Spill- an eng Primärschoul an eng Sportshal.

D'Héicht vum Quartier variéiert tëscht 265 Meter iwwer dem Mieresspigel beim Zuchtunnel Richtung Assurances Sociales zu Hollerech an 306,9 Meter beim Waassertuerm um Kuelebierg.

D'Zéissengerbaach fléisst vum Schléiwenhaff duerch Zéisseng op Hollerech.

Bevëlkerung[änneren | Quelltext änneren]

Am Quartier Zéisseng hunn Enn 2011 2.546 Leit gewunnt, dovu 50,04 % Lëtzebuerger an 49,96 % Auslänner.[1]

Zéissenger no Nationalitéit
Rang Nationalitéit
Awunner Rang Nationalitéit
Awunner
1 LuxembourgLuxembourg Lëtzebuergesch 1 274 10 SpainSpain Spuenesch 19
2 FranceFrance Franséisch 369 11 DenmarkDenmark Dänesch 16
3 PortugalPortugal Portugisesch 254 12 FinlandFinland Finnesch 14
4 ItalyItaly Italienesch 113 13 RomaniaRomania Rumänesch 14
5 BelgiumBelgium Belsch 105 14 PolandPoland Polnesch 13
6 GermanyGermany Däitsch 77 15 JapanJapan Japanesch 12
7 United KingdomUnited Kingdom Britesch 42 16 BulgariaBulgaria Bulgaresch 11
8 NetherlandsNetherlands Hollännesch 23 Aner Nationalitéiten 169
9 United StatesUnited States Amerikanesch 21 Total 2 546

Geschicht[änneren | Quelltext änneren]

D'Primärschoul
D'Zéissenger Kierch
De Waassertuerm um Kuelebierg

Zéisseng gëtt fir d'alleréischt mam Numm an engem Dokument aus dem Joer 1083 genannt, an där de Grof Konrad I. vu Lëtzebuerg der Abtei Almënster e Landhaus mat Ställ a Scheier iwwerschreift.

1681 hunn d'Fransousen ënner dem Louis XIV probéiert, déi vun de Spuenier besate Festung Lëtzebuerg anzehuelen. Dofir hu si d'Hannerland besat an den Awunner hir Wunnengen zerstéiert, hir Béischten an hir Rekolt konfiskéiert. Enn des Joers hunn zu Zéisseng héchstwahrscheinlech keng Leit méi gewunnt; eréischt zwee Joer drop fanne sech erëm nei Bevëlkerungsandroungen an de Kierchebicher.

Bis 1920 huet Zéisseng zur Gemeng Hollerech gehéiert, éier dës de 26. Mäerz an der Gemeng Lëtzebuerg opgaangen ass.

Schoul[änneren | Quelltext änneren]

Bis zur zweeter Hallschent vum 19. Joerhonnert ass et zu Zéisseng keng Schoul ginn. 1863 sinn 63 Zéissenger Kanner op Hollerech an d'Schoul gaangen. Am selwechte Joer gouf d'Entscheedung geholl, eng Schoul mat engem Sall zu Zéisseng ze bauen, déi d'Joer drop hir Dieren opgemaach huet. 1921 ass en zweete Klassesall gebaut ginn. 1957 ass géintiwwer vun der Kierch d'Spillschoul mat zwéi Klasseraim an engem Festsall a Betrib geholl ginn, a fir d'Rentrée 1961 ass eng ganz nei Primärschoul gebaut ginn. Dräi Joer méi spéit gouf dorun déi nei Sportshal bäigebaut.

Kierch[änneren | Quelltext änneren]

  Méi Informatioun doriwwer am Artikel: Kierch Lëtzebuerg-Zéisseng Nuvola apps xmag.png

Éier Zéisseng 1903 seng eege Kierch krut, sinn d'Awunner an déi vun Hollerech gaangen. Well déi éischt Kierch an den 1960er Joren erëm ze kleng ginn ass, 1969 mat den Aarbechten fir en méi e grousst Gebai mat 400 Sëtzplaze ugefaange ginn.

Infrastruktur[änneren | Quelltext änneren]

Déi éischt Waasserleitung ass 1899 ageweit ginn; si ass vun Sandweiler bis op Zéisseng an Hollerech erof komm. Virdrun hunn déi Zéissenger hiert Waasser aus privaten oder aus engem vun den zwéin ëffentleche Pëtze missen huelen. 1931 gouf den éischte Waassertuerm um Kuelebierg mat engem Faassungsverméige vun 1000 Kubikmeter gebaut. 1971 ass Zéisseng dunn an d'Waassernetz vun der SEBES ugeschloss ginn.

Un d'Gasnetz, dat et schonn zanter 1898 zu Hollerech ginn ass, ass Zéisseng eréischt 1920 ugeschloss ginn. Fënnef Joer méi spéit ass och den elektreschen Uschloss gemaach ginn, an 1935 krut Zéisseng seng éischt Stroossebeliichtung.

1927 ass Zéisseng un d'Busnetz vun der Stad Lëtzebuerg ugeschloss ginn.

Veräinsliewen[änneren | Quelltext änneren]

Den éischten Zéissenger Veräin, d' Société Chorale Cessange ass 1902 gegrënnt ginn, aus deem 1913 och den Zéissenger Pompjeescorps Sapeurs-Pompiers Cessange ervirgaangen ass. De Gesangsveräin Chantres de St. Joseph ass 1921 ënner dem Numm Entre-Nous gegrënnt ginn an huet säin aktuellen Numm nom Zweete Weltkrich ugeholl.[2] Zu den aneren nach haut existéierende Veräiner gehéieren Gaart an Heem Zéisseng (1955), d' Dësch-Tennis Amicale Cessange (1957), d' Fraen a Mammen Zéisseng (1962) an d'Theaterfrënn Zéisseng (1981).

Den Zéissenger Foussballsclub ass den FC CeBra 01. E spillt am Stade Boy Konen, deen um Bord vun Zéisseng nieft der Leidelenger Industriezon Grasbësch läit.

Kuckt och[änneren | Quelltext änneren]

Commons: Cessange – Biller, Videoen oder Audiodateien

Quellen[änneren | Quelltext änneren]

Referenzen[änneren | Quelltext änneren]