Eurovision Song Contest 1985


30. Eurovision Song Contest
Datum	4. Mee 1985
Stad	Göteborg (Schweden)
Gebai	Scandinavium
Gewënner	Bobbysocks (Norwegen)
Zuel vu Länner	19
Nei Participatiounen	Keng
Moderatioun	Lill Lindfors
Interval Act	Guitars Unlimited mat schweedeschen Evergreens
Ofstëmmungsreegel	An all Land huet eng Jury 12, 10, 8, 7, 6, 5, 4, 3, 2 an 1 Punkt un déi zéng bescht Lidder verginn.

Den 30. Eurovision Song Contest war de 4. Mee 1985 a Schweden. Organiséiert gouf d'Eurovisioun dat Joer am Scandinavium zu Göteborg. Et war déi gréisst a modernst Hal déi bis dohi fir de Grand Prix gebraucht gi war. Presantatrice war d'Lill Lindfors.

Am Ganzen hunn 19 Länner matgemaach. Malta, Monaco, Holland a Jugoslawien waren net dobäi.

Verschidde Sänger ware scho virdru mol eng Kéier dobäi, de Gary Lux fir Éisträich 1983 (Deel vu Westend), d'Lia Vissi fir Zypern 1980 (Deel vun Epikouri, fir Griicheland), d'Grupp Hot Eyes fir Dänemark 1984, den Izhar Cohen fir Israel 1978, den Al Bano & Romina Power fir Italien 1976, d'Ireen Sheer fir Lëtzebuerg 1974 a 1978 (fir Däitschland), d'Hanne Krogh (Deel vu Bobbysocks) fir Norwegen 1971, d'Elisabeth Andreassen (Deel vu Bobbysocks) fir Norwegen 1982 (Deel vu Chips, fir Schweden), d'Kikki Danielsson fir Schweden 1982 (Deel vu Chips), de Pino Gasparini fir d'Schwäiz 1977 (Deel vun der Pepe Lienhard Band) an d'Mariella Farré fir d'Schwäiz 1983.

D'Reegel fir d'Ofstëmmung ass d'selwecht bliwwe wéi déi Jore virdrun: An all Land huet eng Jury 12, 10, 8, 7, 6, 5, 4, 3, 2 an 1 Punkt un déi zéng bescht Lidder verginn. D'Resultater si per Telefon op Göteborg matgedeelt ginn.

Déi éischt Plaz kruten d'Vertrieder vu Norwegen, den Duo Bobbysocks (Hanne Krogh an Elisabeth Andreassen), mat 18 Punkte Virsprong virum Grupp Wind (Däitschland). Déi drëtt Plaz krut d'Kikki Danielsson, déi fir Schweden ugetruede war.

Fir Norwege war et déi éischt Kéier datt et de Grand Prix gewonnen hat.

Klassement

Plaz	Land	Interpret	Titel	Punkten
1.	Norwegen	Bobbysocks	La det swinge	123
2.	Däitschland	Wind	Für alle	105
3.	Schweden	Kikki Danielsson	Bra vibrationer	103
4.	Groussbritannien	Vikki	Love Is …	100
5.	Israel	Izhar Cohen	Olé, olé	93
6.	Irland	Maria Christian	Wait Until the Weekend Comes	91
7.	Italien	Al Bano a Romina Power	Magic, Oh Magic	78
8.	Éisträich	Gary Lux	Kinder dieser Welt	60
9.	Finnland	Sonja Lumme	Eläköön elämä	58
10.	Frankräich	Roger Bens	Femme, dans ses rêves aussi	56
11.	Dänemark	Hot Eyes	Sku' du spørg' fra no'en?	41
12.	Schwäiz	Mariella Farré a Pino Gasparini	Piano, piano	39
13.	Lëtzebuerg	Margo, Franck Olivier, Diane Solomon, Ireen Sheer Malcolm Roberts, Chris Roberts	Children, Kinder, enfants	37
14.	Spuenien	Paloma San Basilio	La fiesta terminó	36
14.	Tierkei	MFÖ	ai didai dai	36
16.	Zypern	Lia Vissi	To katalava arga	15
16.	Griicheland	Takis Biniaris	Miazoume	15
18.	Portugal	Adelaide	Penso em ti - Eu sei	9
19.	Belsch	Linda Lepomme	Laat me nu gaan	7

Um Spaweck

Commons: Eurovision Song Contest 1985 – Biller, Videoen oder Audiodateien

Lëtzebuerg (Lëtzebuerg)		Bergen (Norwegen)
ESC 1984	Eurovision Song Contest	ESC 1986