Fliger-Monument op der Maulesmillen

Vu Wikipedia
Wiesselen op: Navigatioun, sichen
Geographesch Koordinaten:

D'Fliger-Monument op der Maulesmillen ass e Krichsmonument am Bësch Beischend südwestlech vun der Maulesmillen op der Sektiounsgrenz Boxer/Saassel, dat un den Doud vun dräi briteschen Aviateuren an dräi belschen Zaldoten erënnert déi do ëm d'Liewe koume well hire Fliger ofgeschoss gouf.

D'Monument besteet aus enger Grafplack mat engem Kräiz um Kapp mat ronderëm sechs Grafsteng op deenen d'Nimm vun de Gefale stinn. Op der Grafplack steet:

ICI A ÉTÉ ABATTU EN FLAMMES PAR UN AVION ENNEMI, LE 21.3.1945, L'AVION ANGLAIS FK803 EN RETOUR DE MISSION

AT THIS SPOT A BRITISH AIRCRAFT RETURNING FROM A SECRET MISSION WAS SHOT DOWN IN FLAMES BY THE LUFTWAFFE ON THE 21/3/1945"

D'Grafsteng hunn d'Form wéi déi vun de Commonwealthgriewer awer amplaz am helle Kalleksteen, si s'a blogroem Schifergranit.

D'Monument gouf eng laang Zäit als Halifax-Monument bezeechent. Dat koum dohier well ganz laang ugeholl gouf, de Fliger deen ofgeschoss gouf wier eng Halifax gewiescht. Well awer nëmmen 2 Motoren am groussen Ëmkrees fonnt gi waren, d'Halifax hat der awer véier, gouf dunn nogesicht wateree Fliger et da sollt gewiescht sinn. De G.C. Kieffer, Sekretär vun der Luxembourg Society zu London huet dunn erausfonnt datt de Fliger a Wierklechkeet eng Lockheed Hudson war.

Den 21. Mäerz 1945, owes bei vill Reen a Wolleken, ass eng zweemotoreg Lockheed-Hudson mat der Registratioun FK-803, Code N vum 161. Geschwader vun der Royal Air Force ënner dem Kommando vum Leitnant Helfer op der RAF-Basis Tempsford no bei der Stad Bedfort gestart. Dat Fluchfeld huet bei der RAF eng wichteg geheim Roll gespillt. Den Operateur vum Fluchfeld war d'Special Operations Executive (SOE), en Departement dat vum Churchill gegrënnt gi war, fir de Resistenzler an Europa, mat Ausbildung an Infiltratioun souwéi mat Fräiwëllegen an de besate Länner ze hëllefen.

Den 21. Mäerz 1945 war e schwaarzen Dag an der Geschicht vum 161. Geschwader. Dräi vu fënnef Hudsonfligeren, dorënner d'FK-803, déi op eng Missioun iwwer Däitschland geschéckt gi waren, sinn net méi zréckkomm. De Fluchoffizéier Leitnant Ferris an der Hudson T-9445 "O" war iwwer Manhay mat sengen Equipieren ofgeschoss ginn an de Pilot Regan an der AF-595 "L" a seng Mannschaft sinn an där Nuecht vun hirer Missioun och net méi zréckkomm. D'Hudson vum Leitnant Helfer gouf an där Nuecht um Wee fir an Däitschland an der Géigend vun der Maulesmillen ofgeschoss. Et gëtt ugeholl datt se iertemlecherweis vun engem amerikaneschen Nuetsjeeër P61 ofgeschoss gouf, deen déi Zäit eng Patrull iwwer der Maulusmille geflunn ass an deen ugeholl hat et wier eng DO 217. Eng Salv aus dem Bordgeschëtz hat d'Hudson a Brand gesat, déi séier un Héicht verluer huet a schliisslech am Bëschhank bei der Maulusmillen opgeschloen ass. Den Helfer konnt sech retten, well en a leschter Minutt aus dem Fliger sprange konnt. Hie war den eenzegen Iwwerliewende bei deem Accident. Hie konnt no engem Dag nees zréck op Tempford bruecht ginn.

D'Beschreiwung vum geneeën Hiergank vum Accident koum an d'geheim Archive vun der RAF.