ESO 3.6 m Teleskop

Geographesch Koordinaten:

29° 15’ 39.5’’ S 70° 43’ 54.1’’ W

Den ESO-3,6-m-Teleskop

Den ESO-3,6-m-Teleskop ass en opteschen an Noinfrarout-Spigelteleskop mat engem 3,57 m Spigel an equatorialer Gafelmontéierung. Et gehéiert zum Europäesche Südobservatoire ESO an ass Deel vum La-Silla-Observatoire am Chile.

Den Teleskop steet op enger Héicht vun 2.400 m.

Den Teleskop gouf 1976 gebaut, a war vun 1977 u betriibsbereet. Enn vun de 70er Jore vum 20. Joerhonnert war et mat senge knapps 3,6 m Spigelduerchmiesser an enger Spigelfläch vun 8,6 m² eent vun de gréissten opteschen Teleskope vun der Welt an huet domat ettlech Uschafunge vun den Naturwëssenschafte an Technik ënnerstëtzt. An den 80er Joren hat en eng vun den éischten adaptiven Optike déi an der Astronomie agesat goufen. Vum Joer 2009 war den Teleskop dunn un der Entdeckung vu 75 méiglechen Exoplanéite bedeelegt.

Eng Renovéierung am Joer 1999 an d'Ausstafféierung mat engem neie Sekundärspigel am Joer 2004 hunn et op den haitege Stand bruecht.

Instrumenter

Zanter Abrëll 2008 ass den HARPS, en Akronym fir High Accuracy Radial velocity Planet Searcher, dat eenzegt Instrument um ESO-3,6-m-Teleskop. Den HARPS ass e glasfasergeféierten, héich opléisenden Echelle-Spektrograph, deen eleng fir d'Sich no extrasolare Planéiten agesat gëtt.

Fréier Instrumenter

• CES: E Spektrograph mat engem spektralen Opléisungsverméigen $R={\lambda \over \Delta \lambda }$ vu bis zu 235000 am Wellelängteberäich vun 346 - 1028 nm.
• EFOSC2: Den ESO Faint Object Spectrograph and Camera (v.2), e villsäitegt asetzbaart Instrument fir niddreg Opléisung a Bilderstellung, an der Tëschenzäit och um New Technology Telescope verbaut.
• TIMMI-2: D'Thermal Infrared MultiMode Instrument schafft am Spektralberäich vun 3 μm bis 25 μm.
• ADONIS: En Akronym fir ADaptive Optics Near Infrared System, war en adaptiivt Optiksystem vun der zweeter Generatioun. Méi wéi 40 naturwëssenschaftlech Peer-Review Artikele goufen op Datebasis vun dësem Instrument publizéiert. ADONIS ass déi ausgeräiftst Versioun vu verschiddenen Adaptiven Optik (AO) Prototyppen. A senger finaler Versioun vum Oktober 1996 gouf et en offiziellt ESO Instrument, an am Joer 2001 ausser Déngscht gestallt. ADONIS war dat éischt AO System mat deem eng gréisser Zuel vun Astronome geschafft hunn.

Entdeckungen

Den ESO-3,6-m-Teleskop war zanter dem Dag vu sengem Éischte Liicht un ettlechen naturwëssenschaftlechen Entdeckunge bedeelegt. Speziell a leschter Zäit gouf et mam HARPS engersäits méiglech, de massenäermsten Exoplanéit zu der Zäit vu senger Entdeckung am Joer 2009 opzefannen, de Gliese 581 e, deen nëmmem déi duebel Mass vun eiser Äerd huet.

Anerersäits gouf e friemt Planéitesystem mat siwe Planéiten, déi ëm de sonnenänleche Stär HD 10180 kreesen, entdeckt. Den Teleskop huet och gehollef d'Rätsel vun der Mass vun den Cepheiden ze léisen. Mam HARPS gouf et méiglech, wärend enger Bedeckung vun engem Cepheid mat engem normale Stär déi genee Mass vum Cepheid z'ermëttelen, mat als Resultat eng Bekräftegung vun der Theorie vum Zesummenhank vu Stäremass a Pulsatiounsdauer.

D'Entdeckung vum Exoplanéit Gliese 581 c vum Stéphane Udry an anere vum Observatoire vun der Universitéit Genf gouf de 24. Abrëll 2007 matgedeel.

D'Entdeckungsteam hat den HARPS benotzt an d'Radialvitess analyséiert, fir d'Wierkung vum Planéit op de Stär ze moossen.

Verglach mat aneren Teleskope vun der selwechter Generatioun

#	Numm / Observatoire	Bild	Apertur	M1 Spigelfläch	Héicht	Éischt Liicht	Haaptvertrieder
1	BTA-6 Special Astrophysical Obs		605 cm	26 m2	2070 m	1975	Mstislav Keldysh
2	Hale-Teleskop Palomar-Observatoire		508 cm	20 m2	1713 m	1949	George Ellery Hale
3	Mayall Teleskop Kitt Peak-Observatoire		401 cm	10 m2	2120 m	1973	Nicholas Mayall
4	Blanco Teleskop CTIO Obs.		401 cm	10 m2	2200 m	1976	Nicholas Mayall
5	Anglo-Australian Teleskop Siding Spring Observatoire		389 cm	m2	1742 m	1974	Prince Charles
6	ESO 3.6 m Teleskop ESO La Silla-Observatoire		357 cm	8.8 m2	2400 m	1976	Adriaan Blaauw
7	Shane Teleskop Lick-Observatoire		305 cm	m2	1283 m	1959	Nicholas Mayall

Teleskop a Plaz

• 
  Den 3,6-Meter-Teleskop um La Silla Observatoire.
• 
  D'Strooss fir bei den ESO-3,6-m-Teleskop.
• 
  Riets vir, de Leonhard-Euler-Teleskop, den ESO-3,6-m-Teleskop am Hannergrond.
• 
  Panoramabléck bannen an der Kuppel vum ESO-3,6-m-Teleskop.
• 
  Fréien Owend am ESO La Silla Observatoire, den 3,6-m-Teleskop riets hannen. Credit: ESO.
• 
  Bauplaz vum ESO-3,6-Meter-Teleskop.

Biller

• 
  Biller vun zwou gravitativ interaktive Spiralgalaxien opgeholl mam EFOSC2 um ESO-3,6-m-Teleskop. Credit: ESO
• 
  NGC 520 aus Siicht vum 3,6-m-Teleskop

Kuckt och

Portal Astronomie

• Lëscht vun de gréissten opteschen Teleskopen

Um Spaweck

• ESO-3,6-m-Teleskop-Homepage
• ESO Homepage
• ADONIS-ESO-Webseite
• HARPS-ESO-Webseite