Moskau

Vu Wikipedia
Wiesselen op: Navigatioun, sichen
Москва
Moskau
Wopen Lokalisatiounskaart
Land: Flag of Russia.svg Russland
Federatiounskrees: Zentralrussland
Economesch Regioun: Zentrum
Gegrënnt: 1147
Koordinaten: 55° 45' 00" N
37° 37' 00" E
Fläch: 878,7 km²
Awunner: 11.503.501 (14. Okt. 2010)
Bevëlkerungsdicht: 13.091 Aw./km²
Héicht: 156 m
Zäitzon: UTC+4
Autoskennzeechen: 77, 97, 99, 177, 199
Telefonsprefix: (+7)495, (+7)499
Buergermeeschter: Sergei Sobjanin

Moskau (russ.: Москва [mɐ'skva]) ass d'Haaptstad vu Russland a mat 10.381.288 Awunner (Stand 1. Januar 2005) déi gréisst Stad an Europa. Si ass dat politescht a wirtschaftlecht Zentrum vum Land mat der Lomonossow-Universitéit, Héichschoulen a Fachschoulen, an och kulturell gesi bestëcht Moskau duerch eng Abberzuel vu Kierchen, Theateren, Muséen, Galerien an de 577 Meter héije Fernsehtuerm. De Kreml an déi Rout Plaz am Zentrum vu Moskau stinn zanter 1990 op der UNESCO-Lëscht vun der Weltkulturierfschaft. Mat néng Kappgaren, véier grousse Fluchhäfen an dräi Bannenhäfen ass d'Stad dee wichtegste Verkéiersknuet an déi gréisst Industriestad vu Russland.

Geographie[änneren | Quelltext änneren]

Geographesch Lag[änneren | Quelltext änneren]

Foto vu Moskau a sengem Perimeter (NASA Satellit Landsat 7)

Moskau läit am europäeschen Deel vu Russland an am Duerchschnëtt 156 Meter iwwer dem Mieresspigel, am Hiwwelland tëscht de Flëss Oka a Wolga, an un den zum Deel géien Ufere vun der Moskwa, engem Niewefloss von der Oka, déi an d'Wolga leeft.

D'Moskwa dréint a kéiert sech queesch duerch d'Stad vun Nordwest no Südost. Am Stadgebitt as hir Längt zirka 80 Kilometer an hir Breet 120 bis 200 Meter. Den 126 Kilometer laange Moskau-Wolga-Kanal, deen 1937 fäerdeg gouf, suergt fir d'Schëffbarkeet vum Floss. Ongeféier 120 kleng Flëss stréimen der Moskwa zou. Ausser 14 Stéck goufe se all an ënnerierdesch Rouersystemer verluecht.

D'Stadgrenze gi forméiert duerch den 109 Kilometer laangen Autobunnsréng, deen 1962 gebaut gouf. D'Stadgebitt huet eng Fläch vun 878,7 Quadratkilometer. D'Gréngfläche maachen ongeféier een Drëttel vum Stadgebitt aus. Dozou gehéiere zirka 100 Parken an iwwer 800 gefleegten Anlagen, beräichert duerch ongeféier 500 Weieren. Ëm d'Stad zitt sech eng 30 bis 40 Kilometer laang Bëschparkzone mat enger Abberzuel vun Erhuelungs- an Amëséierariichtungen. D'Fläch vun deem Bëschpark bedréit 1.725 Quadratkilometer.

Déi geographesch Koordinate vu Moskau sinn: 55,75 Grad Nord a 37,62 Grad Ost.

Klima[änneren | Quelltext änneren]

D'Haaptstad läit an der kontinentaler Klimazone. Déi duerchschnëttlech Jorestemperatur bedréit 5 Grad Celsius, Ree fält es iwwer d'Joer am Duerchschnëtt 688 Millimeter. Dee meeschte Ree fält am Juli mat 92 Millimeter am Mount, dee mannsten am Mäerz mat 34 Millimeter. De Wand bléist net iwwerméisseg, d'Loft ass dréchen. De Wandchill-Faktor (d. h. déi gefillten Temperatur) ass dowéinst relativ niddreg, a grousse Frascht ass also verhältnisméisseg liicht z'erdroen.

Klimadiagramm vu Moskau

Dacks ginn d'Wantertemperaturen zu Moskau erof bis ëm déi -12 bis -15 Grad Celsius, deelweis ginn souguer Temperature bis ënner -20 Grad Celsius gemooss. Mä et kann au Contraire awer och grad sou séier alles nees opdeeën, wéi et virdru gefruer war. Wat d'Duerchschnëttstemperaturen am Wanter ugeet, déi leien am Dezember bei -6,1, am Januar bei -9,3 an am Februar bei -7,7 Grad Celsius. Am Fréijoer klëmmt d'Quecksëlwer lues a lues an de Plusberäich: Mäerz -2,2, Abrëll 5,8 a Mee 12,9 Grad Celsius am Duerchschnëtt. De Summer ass an der Haaptstad an der Regel angeneem waarm a sonneg, heinansdo awer och immens gliddeg. An de Summerméint läit d'Temperatur am Duerchschnëtt am Juni bei 16,6, am Juli bei 18,1 an am August bei 16,4 Grad Celsius. Am Hierscht ginn d'Duerchschnëttstemperature rapid an de Keller: September 10,9, Oktober 5 an November -1,1 Grad Celsius.

De Schnéi an der Stad fängt no de Berechnunge vun de Moskauer Phänologen ëm de 16. Mäerz u mat deeën, den Äisbroch op dem Moskwa-Floss ass ëm den 12. Abrëll fälleg, mat dem Optriede vun den éischte Wiederen ass ëm den 2. Mee ze rechnen, mat den éischten Nuetsfräscht ëm de 14. September a mam éischte Schnéi ëm den 28. Oktober. De Moskwa-Floss fréiert ëm den 18. November zou. Eng fest Couche Schnéi bilt sech ëm den 23. November.

Am risege Moskau kann ee ganz aner Klimaverhältnisser feststellen, jee nodeem op een an der Bannestad, an engem vun de Viruerten oder an den Alentoure lieft. Am Zentrum ass et méi dréchen a méi waarm, woubäi d'Temperatur an der Banlieue gutt a gär ëm déi zwee bis dräi Grad Celsius méi niddreg läit.

Rout Plaz, Kreml a Lenin-Mausoleum (an der Mëtt)
Manif vun der Russescher KP virum Lenin-Mausoleum op der Rouder Plaz.

Geschicht[änneren | Quelltext änneren]

Moskau gëtt 1147 fir d'alleréischt ernimmt, a schonn e puer Joer drop, 1156, ass ënner dem Fürst Juri Dolgoruki (1090-1157) déi éischt, nach hëlze Wieranlag vum Kreml entstanen, bannent där sech aus engem klenge Kaff lues a lues eng beuechtenswäert Siidlung entwéckelt huet. Dozou bäigedroen huet och, datt Moskau un der Handelsroute laanscht d'Moskwa läit, vun där d'Stad iwregends den Numm krut. Den Iwan III., dee gemenkerhand als Eeneger vu Russland ugesi gëtt, huet am 15. Joerhonnert d'Kathedrale vum Kreml baue gelooss a Moskau zur Haaptstad vu sengem neie Kinnekräich erkläert. Am 18. Joerhonnert huet de Péiter de Groussen d'Haaptstad op St. Petersburg verluecht, wou se och praktesch déi ganz Zäit bliwwen ass, bis datt d'Bolschewiken de Regéirungssëtz 1918 erëm zréck op Moskau bruecht hunn.

Iwwer d'Joren ass d'Stad dacks uerg geplëmmt a bis op d'Grondmaueren niddergebrannt ginn, vun Tataren, Polen an och de Fransousen. Mä wéinst dem zéie Geescht vun der russescher Bevëlkerung ass d'Stad ëmmer nees opgebaut ginn, grad sou vital, wann net souguer méi wéi virdrun.

Hautdesdaags ass d'Stad genee sou kapitalistesch agestallt wéi London oder New York, an et kritt een do alles ze kafe wat et gëtt, vum BigMac bis zu BMWen.

Politik[änneren | Quelltext änneren]

D'Stad Moskau ass a Russland en eegestännegt Federatiounssubjekt. Moskau ass donieft nach d'Haaptstad vum Federatiounskrees Zentralrussland an der Oblast Moskau (dat ass de Groussraum Moskau ouns d'Stad selwer). D'Oblast gliddert sech an 39 Rayonen (Kreesser) an d'Stad selwer an zéng Bezierker an 125 Uertsdeeler. D'Stadbezierker vu Moskau sinn déi heiten:

  • Norden (Sewerny)
  • Nordosten (Sewerowostochny)
  • Nordwesten (Sewerozapadny)
  • Osten (Wostochny)
  • Süden (Juschny)
  • Südosten (Jugowostochny)
  • Südwesten (Jugozapadny)
  • Westen (Zapadny)
  • Zelenograd
  • Zentrum (Centralny)
Basilius-Kathedral
Lomonossow-Universitéit

Kuckeswäertes[änneren | Quelltext änneren]

Sech net entgoe loosse sollt ee sech déi folgend Muséeën, Bauwierker, Monumenter, etc.:

Economie an Infrastruktur[änneren | Quelltext änneren]

De GUM Akafszenter

Moskau spillt eng Schlësselroll an der Economie vu Russland. Den Undeel vun der Stad um Bruttoinlandsprodukt vum Land bedréit 12,5 Prozent. Ongeféier ee Véirel vun der Industrieproduktioun vu Moskau geet op de Kont vum Maschinnebau, deem seng Haaptbranchen Handwierksgeschirbau, Elektroindustrie, Lagerfäerdegung, Autoindustrie a Gerätebau sinn. Weider wichteg Industriebranche sinn d'Schmelzen, Liicht-, Baustoff-, Chimie- a petrochemesch Industrie. D'Stad ass och e grousst Zentrum vum Militär-Industrie-Komplex.

Zu Moskau si zirka 80 Prozent vum Finanzpotenzial vum Land konzentréiert. Zwee Drëttel vun allen auslänneschen Investitiounen an d'Economie vu Russland ginn an d'Haaptstad.

An der Stad gëtt et ongeféier 18.500 Handels-, Hôtellerie- an Déngschtleeschtungsbetriber, 9.000 Klenghandelsobjekter an ëm déi 150 Mäert, an deene zirka eng Millioun Persoune beschäftegt sinn.

GUM Akafszenter bannen

Bekannte Moskowiter[änneren | Quelltext änneren]

Literatur[änneren | Quelltext änneren]

  • Schaeder Hildegard, Moskau, das dritte Rom, Darmstadt 1957.
  • Rüthers Monica, Moskau, Köln 2003.

Um Spaweck[änneren | Quelltext änneren]

Commons: Moskau – Biller, Videoen oder Audiodateien