Regierung Reuter

D'Regierung Reuter war zu Lëtzebuerg vum 28. September 1918 bis den 20. Mäerz 1925 am Amt. Si war aus de Chamberwale vum 28. Juli, respektiv dem 4. August 1918 ervirgaangen a gouf de 5. Januar 1920 ëmgebilt, als Resultat vun de Chamberwale vum 26. Oktober 1919.

De 15. Abrëll 1921 koum et zu enger weiderer Ëmbildung, wéi déi Liberal net méi an der Regierung dobäi waren.

D'Regierung Reuter hat virun allem domat ze dinn, déi wirtschaftlech a politesch Nei-Orientéierung vu Lëtzebuerg, nom Enn vum Éischte Weltkrich, z'organiséieren, d.h. d'Erausgoen aus der Douanesunioun mat dem Däitsche Räich, dem sougenannten Däitschen Zollveräin, an d'Opbaue vun enger Wirtschafts- a Wärungsunioun mat der Belsch, der Union économique belgo-luxembourgeoise (UEBL). Och d'Stolindustrie an d'Eisebunn hunn hir respektiv Besëtzer misse wiesselen.

1925 koum et zu enger Regierungskris well d'Chamber de Virschlag vun der Regierung, d'Eisebunnsgesellschafte Guillaume-Luxembourg a Prince-Henri ze vereenegen, refuséiert huet. D'Regierung Reuter ass doropshin zeréckgetrueden.

Zesummesetzung

Vum 28. September 1918 bis de 5. Januar 1920

• Émile Reuter: Staatsminister, Regierungspresident, Generaldirekter fir Aussebezéiungen an den Interieur
• Nicolas Welter: Generaldirekter fir Bildung
• Auguste Liesch: Generaldirekter fir Justiz a Bauten
• Alphonse Neyens: Generaldirekter fir Finanzen
• Eugène Auguste Collart: Generaldirekter fir Landwirtschaft, Industrie an Aarbecht

Vum 5. Januar 1920 bis de 15. Abrëll 1921

• Émile Reuter (Rietspartei): Staatsminister, Regierungspresident, Generaldirekter fir Aussebezéiungen and en Interieur
• Nicolas Welter: Generaldirekter fir Bildung
• Auguste Liesch (Liberal): Generaldirekter fir Justiz a Bauten
• Alphonse Neyens (Riets): Generaldirekter fir Finanzen
• Raymond de Waha (Riets): Generaldirekter fir Landwirtschaft a Sozialversécherung
• Antoine Pescatore (Liberal): Generaldirekter fir Handel, Industrie an Aarbecht

Vum 15. Abrëll 1921 bis den 20. Mäerz 1925

• Émile Reuter (Rietspartei): Staatsminister, Regierungspresident, Generaldirekter fir Aussebezéiungen
• Alphonse Neyens (Riets): Generaldirekter fir Finanzen
• Raymond de Waha (Riets): Generaldirekter fir Landwirtschaft, Industrie a Sozialversécherung
• Guillaume Leidenbach (Riets): Generaldirekter fir Justiz a Bauten (ass de 14. Mäerz 1923 zeréckgetrueden; de Guillaume Soisson gouf zum Generaldirekter fir Bauten ernannt)
• Joseph Bech (Riets): Generaldirekter fir den Interieur a fir Bildung

Kuckt och

• Lëscht vun de lëtzebuergesche Premierministeren

Um Spaweck

• Thewes, Guy: Les gouvernements du Grand-Duché de Luxembourg depuis 1848, ISBN 2-87999-118-8
• Le gouvernement du Grand-Duché de Luxembourg 2013, Service information et presse du gouvernement (2014)
• Le gouvernement du Grand-Duché de Luxembourg 2018 , Service information et presse du gouvernement (2019)