Vëlospist PC1

Vëlospist PC1

Schëld zu Fenteng
Alternativen Numm	Itinéraire cyclable du centre
Lëtzebuerger Numm	Zentrumspist
vu(n)	Gronn
op	Gronn
Längt	43 km
déifste Punkt	Beggen
héchste Punkt	Biergerkräiz
Land	Lëtzebuerg
OpenStreetMap	Vëlospist PC1

Geplangte Verlaf vun der Vëlospist PC1

D'Vëlospist PC1 (och nach Zentrumspist, Itinéraire cyclable du centre), ass eng vun de 40 Vëlosstrecke vum nationale Reseau zu Lëtzebuerg.

Streck

Et muss ënnerscheet ginn tëscht dem aktuelle Verlaf (Stand: 2025) vun der PC1 an deem geplangten; si hu komplett aner Tracéen.

Aktuell

D'PC1 ass 43 km laang a féiert vum Gronn aus an engem Bou ëm d'Stad Lëtzebuerg nees dohinner zeréck. Den déifste Punkt (230 m) ass zu Beggen an den héchsten (375 m) um Biergerkräiz. Mat Ausnam vun e puer Deeler op der Kockelscheier (2,9 km) an am Bambësch (6,1 km) ass se iwwerall macadamiséiert.

Zanter dem 25. Mäerz 2022 leeft d'PC1 tëscht Beggen an dem Raspert zu Dummeldeng op enger Streck vu ronn engem Kilometer net méi iwwert d'Strooss, ma iwwert e sonnere Wee fir Foussgänger a Cyclisten.

Se féiert laanscht oder duerch follgend Uertschaften (am Sënn vun der Auer): Lëtzebuerg-Gronn, Polvermillen, Gantebeensmillen, Izeger Stee, Hesper, Fenteng, Kockelscheier, Zéisseng, Märel, Belair, Stroossen, Reckendall, Bambësch, Biergerkräiz, Juegdschlass, Beggen, Dummeldeng, Eech a Pafendall.

Geplangt

Déi geplangt Streck vun der PC1 geet um Kierchbierg bei der Luxexpo fort a féiert iwwer d'Pôle-d'échangë Rout Bréck - Pafendall, Gare Centrale, Lycée Bouneweg, Houwald a Cloche d'or. De facto existéiert se praktesch komplett, wann och ouni Nummer. Si verleeft gréisstendeels parallel zu der Tramslinn T1. Dee spektakuläesten Deel ass deen iwwert d'Vëlos-Passerell ënnert der Neier Bréck.

D'Streck verleeft och zum gréissten Deel iwwer Vëlospisten, déi vum motoriséierten Trafic a vun de Foussgänger getrennt sinn. Just op e puer kuerzen Deelstécker, wou et méi enk ass, si Vëlosfuerer a Foussgänger gemëscht.

Se kritt Uschloss u follgend Pisten:

• PC2 um Kierchbierg
• PC15 um Pôle d'échange Rout Bréck - Pafendall
• PC13 a PC33 an der Uewerstad
• PC104 op der Gare
• PC31 zu Bouneweg
• PC11 a PC15a um Pôle d'échange Houwald
• PC31 a PC103 op der Cloche d'or.

An der Géigend vum Lycée Vauban ass eng Niewestreck 1a virgesinn, déi en Uschloss un d'PC33 an der Aktivitéitszon Cloche d'or erméiglecht.

Uschlëss

Aner Pisten

D'Zentrumspist huet aktuell ënnerwee Uschlëss un aner Pisten (am Sënn vun der Auer):

• tëscht Hesper an Alzeng ass en Uschloss un déi zukünfteg Pist Charly Gaul (PC11) virgesinn
• op der Cloche d'or an zu Zéisseng kënnt een op d'PC9 (Pist vun de Minettsvirstied)
• zu Stroossen huet se Uschloss un d'Pist Nicolas Frantz (PC13)
• zu Beggen nieft der neier Foussgängerbréck ass den Uschloss un d'Uelzechtpist (PC15)
• zu Dummeldeng ass eng Verbindung op d'Iechternacher Pist (PC2).

Biller

Alen Trajet

• 
  Um Depart am Gronn
• 
  Uertschaftsschëld um Wee

Neien Trajet

• 
  Um Kierchbierg, beim Tramshalt Europaparlament
• 
  Ënnert der Neier Bréck
• 
  An der Neier Avenue, virum Rousegäertchen (lénks)
• 
  Virun der Stater Gare
• 
  Op der Héicht vum Halt Houwald Gare (riets)
• 
  Beim Stadion (lénks)

Um Spaweck

Commons: Vëlospist PC1 – Biller, Videoen oder Audiodateien

• Iwwersiichtkaart (2024) mat de Vëlospisten (PDF), op der Websäit vu Luxembourg for Tourism (visitluxembourg.com)

D'Vëlospist PC1 op:

• der Internetsäit vu Luxembourg for Tourism (visitluxembourg.com)
• der Internetsäit vu Ponts et chaussées
  • idem (archivéiert Versioun 2019)