Groussbritannien an Nordirland

Vu Wikipedia
(Virugeleet vu(n) Groussbritannien)
Wiesselen op: Navigatioun, sichen


United Kingdom of Great Britain and Northern Ireland

Union Jack

Wope vum Vereenegte Kinnekräich vu Groussbritannien an Nordirland

Detailer

Detailer
National Devise: Dieu et mon droit
(Devise vun der Monarchie)
EU location UK.png
Offiziell Sprooch: Englesch (de facto)
Haaptstad: London
Staatsform: Konstitutionell Monarchie
 • Kinnigin: Elizabeth II.
 • Premierminister: David Cameron
Fläch: 242 495 [1] km²
 • Dovu Waasser: 1,3 %
Bevëlkerung: 60 587 300 [2]
 • Bevëlkerungsdicht: 250/km²
Nationalfeierdag: 2. Samschdeg am Juni
(Gebuertsdag vun der Kinnigin)
Nationalhymn: God Save the Queen
(Lauschteren)
Währung: Pond-Sterling (£, GBP)
Zäitzon: UTC +0
Internet TLD: .uk, .gb (net am Gebrauch)
Internationalen
Telefonsprefix
:
+44
UK Kaart cia.png

D'Vereenegt Kinnekräich vu Groussbritannien an Nordirland (englesch: United Kingdom of Great Britain and Northern Ireland), op Lëtzebuergesch dacks mat Groussbritannien ofgekierzt, ass e souveräne Staat op den am Nordweste vun Europa geleeëne briteschen Inselen. Dozou gehéieren d'Insel Groussbritannien, den nordëstleche Wupp vun der irescher Insel an eng sëlleche méi kleng Inselen. Den haitege Staat ass eng politesch Unioun tëscht de véier Deelstaaten England, Wales, Schottland (allen dräi op der Insel Groussbritannien) an Nordirland (Insel Irland). D'Grenz tëscht Nordirland an der Republik Irland ass déi eenzeg Staatsgrenz iwwer Land. Natierlech Grenze maachen den Atlanteschen Ozean, d'Irescht Mier, d'Nordmier an den Äermelkanal (Manche). D'Insel Groussbritannien ass mam Tunnel ënner der Manche mat Frankräich verbonn.

D'Vereenegt Kinnekräich ass eng parlamentaresch Demokratie a konstitutionell Monarchie. De Regierungssëtz ass zu London, der Haaptstad vum Land. Staatschefin ass d'Kinnigin Elizabeth II. D'Kroundépendancen (crown dependency) Isle of Man an d'Kanalinselen Jersey a Guernsey si formell am direkte Besëtz vun der britescher Kroun, gehéieren awer net zum Staat. D'Vereenegte Kinnekräich huet d'Souveränitéit iwwer 14 Iwwerséigebidder, déi meescht dovu si fréier Krounkolonien déi aus ënnerschiddlechen Ursaachen ni onofhängeg gi sinn. Aner Lännereien an Deeler vum fréiere briteschen Imperium sinn haut onofhängeg Staaten oder goufe wéi fir d'lescht 1997 Hong Kong (zanterhier nees chinesesch), un aner Staaten ofginn. Den historeschen Afloss deen d'britesch Expansiounspolitik op grouss Deeler vun der Welt hat, huet sech an der Kultur a Sprooch vu Länner wéi Kanada, Australien, Neiséiland, Indien, Pakistan, Südafrika, de Vereenegte Staate vun Amerika an aneren, global manner aflossräichen onofhängege Staaten niddergeschloen.

D'Vereenegt Kinekräich ass bis haut iwwer d'Monarchie a Personalunioun mat 15 souveräne Staaten. Dës sougenannt Commonwealth Realms ("Kinnekräicher vum Commonwealth") si Länner an deenen d'britesch Monarchin Kinnigin an offiziell Staatschefin bliwwen ass. Do donieft huet d'Kinnekräich mam Commonwealth of Nations eng international Institutioun geschaf fir de politesche Kontakt mat -an der Majoritéit- Nofolgerstaate vu fréieren Territoiren aus imperialer Zäit ze halen.

D'Vereenegt Kinnekräich huet ronn 60,6 Milliounen Awunner an ass eent vun de gréisste Memberlänner vun der Europäescher Unioun. D'Brite sinn zanter 1973 an der Unioun.

D'Kinnekräich ass e G8-Staat a Grënnnungsmember vun der NATO an de Vereente Natiounen. D'Atommuecht huet e permanente Sëtz am Sécherheetsrot.

Den Numm[änneren | Quelltext änneren]

Den offizielle Staatsnumm op Englesch ass United Kingdom of Great Britain and Northern Ireland. D'Brite selwer hunn awer éischter United Kingdom, Britain oder UK am alldeegleche Gebrauch wa se vun hirem Land schwätzen.

Den offizielle Staatsnumm an de Sproochen déi der Europäescher Charta fir Regional- oder Minoritéitssproochen no regional vum Vereenegte Kinnekräich unerkannt gi sinn:

  • Teyrnas Unedig Prydain Fawr a Gogledd Iwerddon (Walisesch)
  • An Rìoghachd Aonaichte na Breatainn Mhòr agus Eirinn a Tuath (Schottesch)
  • Ríocht Aontaithe na Breataine Móire agus Thuaisceart Éireann (Irlännesch)
  • An Rywvaneth Unys a Vreten Veur hag Iwerdhon Glédh (Kornesch)
  • Unitit Kinrick o Great Breetain an Northren Ireland (Scots)

Am Lëtzebuergesche gëtt -grad wéi an enger Rëtsch aner Sproochen- vill vu "Groussbritannien", dacks souguer nach vun "England" geschwat wann d'Vereenegt Kinnekräich gemengt ass. Groussbritannien ass reng geographesch gesi falsch, well et eben och den offiziellen Numm vun der gréisster vun de briteschen Inselen ass. Zu der Insel Groussbritannien gehéiere just England, Wales a Schottland. Dee véierte Landesdeel, Nordirland läit dogéint op der Insel Irland.

De "Great" am Great Britain kënnt vum franséische Grande Bretagne a markéiert den Ënnerscheed zu der franséischer Bretagne. De laténgeschen Numm Britannia geet op d'keltescht Wuert "Brith" fir faarweg oder fleckeg zréck.

Beschreiwung[änneren | Quelltext änneren]

Klima[änneren | Quelltext änneren]

De Klima ass ozeanesch mat kille Summeren a mëlle Wanteren. Duerch deen heefege Westwand kënnt vill fiicht Loft iwwer d'Inselen an et reent relativ vill. Bedingt duerch déi héich Loftfiichtegkeet entsteet dacks Niwwel. De Klima gëtt staark vum Golfstroum beaflosst.

Vegetatioun[änneren | Quelltext änneren]

Fréier gouf et grouss Bëscher, déi awer staark ofgeholz goufen well d'Land vill Holz gebraucht huet fir Schëffer ze bauen.

Bevëlkerung[änneren | Quelltext änneren]

Nieft den Englänner, Waliser, Schotten an Iren liewe vill Mënschen aus dem Commonwealth, déi zanter 1950 agewandert sinn, an den Industriegebidder op de briteschen Inselen. Méi wéi 1/3 vun allen Awunner liewen an de grouse Ballungsräim. Wales a Schottland si relativ dënn besiidelt.

Relioun[änneren | Quelltext änneren]

D'Majoritéit vun den Awunner bekennt sech zur Kierch vun England, déi Staatskierch ass.

Notizen a Referenzen[änneren | Quelltext änneren]

  1. Source: Encyclopedia Britannica online (Abrëll 2008)
  2. Zuele fir 2006 (statistics.gov.uk).
    Bei der leschter Volllekszielung, den 29. Abrëll 2001, goufen 58 789 194 Awunner gezielt. Source: Office for National Statistics, Census 2001

Kuckt och[änneren | Quelltext änneren]

Commons: Vereenegt Kinnekräich – Biller, Videoen oder Audiodateien

Um Spaweck[änneren | Quelltext änneren]

Flag GB template.gif Dëse Geographiesartikel iwwer dVereenegt Kinnekräich vu Groussbritannien an Nordirland ass eréischt just eng Skizz. Wann Dir méi iwwer dëst Thema wësst, sidd Dir häerzlech invitéiert, aus dëse puer Sätz e richtegen Artikel ze schreiwen. Wann Dir Hëllef braucht beim Schreiwen, da luusst bis an d'FAQ eran.