Avenue Gaston-Diderich

Avenue Gaston Diderich

Numm	lb: Dauvelt fr: Avenue Gaston Diderich
Fréieren Numm	fr: Rue Belair de: Prinz Eugenstraße
Längt	ca. 1.568 m
Land	Lëtzebuerg
Gemeng	Lëtzebuerg
Uertschaft	Lëtzebuerg
Quartier	Belair
Postcode	1420
Koordinaten	49° 36’ 36.4’’ N       06° 06’ 24.4’’ O
Genannt no	Gaston Diderich

D'Avenue Gaston Diderich ass eng Strooss um Belair an der Stad Lëtzebuerg. Se fänkt beim Boulevard Grande-Duchesse Charlotte un a verleeft dann a Richtung Weste bis bei de Märeler Kierfecht an der Rue des Aubépines.

D'Strooss déi 1913 nach Dauwelterwee geheescht huet, gouf méi spéit d'Rue Belair a schlussendlech 1947 nom fréiere Stater Buergermeeschter Gaston Diderich benannt, deen dat Joer virdru gestuerwe war. Ënner der däitscher Besatzung (1940 - 1944) huet se „Prinz Eugenstraße” geheescht.

Am westlechen Deel vun der Avenue, do wou d'Strooss vis-à-vis vun der Rue d'Oradour e liichte Bou mécht, stoung fréier am Feld de Gaalge vun der Stad. Dorop zeréckzeféieren ass de Flouernumm Gaalgebierg deen haut nach op der Kadasterkaart agedroen ass.

D'Haiser op Nummer 42-44 a 50A goufen den 21.9.2007, resp. de 26. 1.2015, op den Zousazinventaire vun de klasséierte Monumenter agedroen.

Gebaier

Laanscht d'Avenue leien ë. a. dës Gebaier:

• Christ Roi-Kapell
• Villa Leclerc (Gebai vum Kadaster)
• Haus Bel-Air
• Belairer Kierch

Biller

• 
  Villa Leclerc
• 
  Maison Bel-Air
• 
  Duebelhaus Nr. 42-44
• 
  De Sëtz vun der Stëftung Hëllef Doheem (Haus Nr. 50A)
• 
  Martin-Luther-Haus vun der Evangelischen Gemeinde deutscher Sprache in Luxemburg

Um Spaweck

Commons: Avenue Gaston Diderich – Biller, Videoen oder Audiodateien

• De Gaalgebierg um Belair op der Kaart vum Kadaster